Rikthehet Akuino, Laçi luan dy transferta radhazi
Loja e zhvilluar kundër Flamurtarit la të pakënaqur drejtuesit e klubit kurbinas dhe trajnerin Ramadan Ndreu. Laçi shmangi humbjen vetëm në minutat e fundit, pas një goli të mbrojtësit Bruno Lulaj, i cili rezulton edhe shënuesi më i mirë (2 gola). Problemi më i madh i kurbinasve në këto tetë javë ka qenë reparti i sulmit, ku si titullarë kanë luajtur brazilianët Bruno Akuino dhe Paulo Serxhio Taubate. Mirëpo, asnjë prej tyre nuk ka arritur të zhbllokohet dhe kjo ka zhgënjyer pa masë drejtuesit bardhezi. Nesër Laçi luan ndeshjen e parë të turit të dytë për Kupën e Shqipërisë kundër Bylisit në Ballsh. Synimet e klubit këtë sezon mbeten modeste sa i përket këtij kompeticioni, pasi së pari do të kërkohet mbijetesa në Superiore. Megjithatë, bardhezinjtë do tentojnë kualifikimin ndaj një kundërshtari që, në vitet e fundit, kanë rivalizuar shumë, madje kanë arritur të diskutojnë edhe finalen e Kupës në vitin 2013. Laçi pritet të bëjë rrotacion në formacion ndaj Bylisit, ndërsa përqendrimi më i madh është në takimin që do të zhvillohet kundër Teutës të dielën në Durrës. Kjo ndeshje merr një rëndësi të madhe për të dyja skuadrat, që janë në fundin e tabelës. Kurbinasit do të luftojnë fort për të mos dalë pa pikë, pasi një humbje do t'u përkeqësonte pozitat në klasifikim. Pas pezullimit për shkak kartonësh, në dispozicion të Ndreut do të jetë sulmuesi Akuino. Nuk është e thënë që kurbinasit të jenë të plotë, pasi mbrojtësi kosovar, Arbër Shala, ka plotësuar numrin e kartonëve dhe do të mungojë kundër Teutës. Trajneri Ndreu po punon shumë me skuadrën, veçanërisht në aspektin sulmues.