Shmanget analiza e humbjes, përgatitje sërish për Luftëtarin
Ngjeshja e kalendarit për shkak të ndeshjeve të Kupës që do të zhvillohen në mesjavë, ka bërë që bardheblutë të mos kenë asnjë ditë pushim. Pas humbjes së pësuar në stadiumin e Peqinit përballë Luftëtarit, të besuarit e trajnerit Daja kanë zbritur në terrenin stërvitor për të bërë gati takimin e radhës. Shorti i Kupës së Shqipërisë i ka ballafaquar sërish me skuadrën gjirokastrite. Gjatë seancës së djeshme të zhvilluar në orën 11:00 në fushën me tapet sintetik në kompleksin "Skënder Halili", trajneri Daja e ka shmangur analizën dhe kritikat për të tijtë. Tekniku bardheblu ka përllogaritur vetëm ngarkesat që duhet të marrë secili grup lojtarësh, në bazë edhe të ndeshjes së fundjavës për kampionat. Sot, pritet një tjetër seancë stërvitore në të cilën do të saktësohet edhe 11-tëshja që do të zbresë në fushë përballë gjirokastritëve.