"Ja pse po bind Lushnja, ka një sulm të frikshëm"

Xhavit Sefa, ish-sulmuesi simbol dhe ish-trajneri i Lushnjës, në një prononcim për gazetën "Panorama Sport" është shprehur për situatën aktuale të futbollit. Ikona e futbollit lushnjar tha se ecuria pozitive e ekipit është një ogur i mirë për të përmirësuar situatën në përgjithësi. Sefa - "Unë mund të them që Lushnja ka vuajtur në startin e sezoneve. Ka lënë pikë që në fillim dhe i ka vuajtur gjatë garës. Fillimi i këtij edicioni me pikë të plota është për t'u përshëndetur. Mendoj se kjo do ta ndihmojë Lushnjën, sidomos në aspektin psikologjik. Edhe pse është luajtur shumë pak, pretendentët e tjerë kanë lënë shumë pikë. Më kujtohet që pesë sezone më parë, Lushnja arriti të fitonte tetë ndeshje radhazi, por shkoi në ndeshje shtesë meApoloninë dhe humbi. Nuk arriti të kualifikohej direkt sepse la shumë pikë në fillim. Jam shumë dakort me shprehjen: 'fillimi i mbarë, gjysma e punës'. Goditja jepet që në fillim. Tani Lushnja është skuadra më e kuotuar për të kaluar në Superiore. Duket qartë që është një skuadër e motivuar për të fituar. Mendoj që ruajtja e grupit kryesor të lojtarëve, marrja e Maganit, rikthimi i Branicës dhe sidomos i Cankës ka bërë që të kemi një skuadër shumë më të mirë sesa sezoni i kaluar", tha Sefa. Më tej, ai flet edhe për dyshen sulmuese, Canka-Sefa. "Lushnja ka një dyshe shumë kualitative në sulm. Ka dy sulmues që koordinojnë shumë mirë veprimet me njëri-tjetrin. Dua të theksoj se kjo dyshe i mban shumë nën presion mbrojtjet kundështare. Mendoj që do të jetë dyshja që do të shënojë më shumë në këtë kategori", tha Sefa. Alban Alushi