E mbylli me gol, Gashi nderohet me “Lojtari i Vitit”
"Sezon i jashtëzakonshëm, nder i madh për mua"
Kolorado Rapids e Shkëlzen Gashit ka mbyllur sezonin e rregullt në Konferencën e Perëndimit të MLS në vendin e dytë, ndërsa sulmuesi shqiptar ka shënuar 9 gola në këtë edicion të tij të parë në SHBA. "Jam krenar për këtë skuadër, ishte një vit i gjatë. Kemi fituar shumë dhe kemi humbur bashkë. Por ishte gjithçka fantastike. Nëse dikush do të më kishte thënë në fillim të sezonit 'do të bëni shumë pikë dhe do të përfundoni të dytët' nuk do ta kisha besuar. Por tani është e vërtetë, duhet t'i gëzohemi kësaj arritje dhe të bëhemi gati për 'play-off'. Duhet t'i falënderoj të gjithë tifozët për mbështetjen", tha Gashi pas ndeshjes ndaj Dinamo Hjuston ku ai shënoi golin për Koloradon në barazimin 1-1. "Për mua është shumë e rëndësishme që ne të fitonim ndeshjen, pastaj të shënoja. Por sigurisht që jam i gëzuar. Nuk kam shumë gjëra në kokë, unë thjesht luftoj, dua të shënoj dhe të argëtohem në ndeshje. Kjo është ajo që duam të bëjmë të gjithë. Tani duhet të rikuperojmë dhe analizojmë situatat këto ditë, pasi kundërshtarët mund të krijojnë raste. Duhet të jemi gati që nga sekonda e parë deri tek e fundit. Në 'play-off' duhet të japim gjithçka, janë dy ndeshje që duhet t'i fitojmë. Unë besoj te skuadra dhe secili lojtar në ekip, tani të bëhemi gati që të shkojmë në raundin tjetër", ishin fjalët e sulmuesit shqiptar, i cili është kthyer në një nga liderët e Kolorados në këtë sezon.
Nderimi - Tifozët e kësaj skuadre e kanë mbështetur gjithmonë futbollistin e Kombëtares në këtë sezon. Në fund të tij, Gashi ka marrë edhe një nderim prej tyre. Në faqen e tij zyrtare në rrjetin social "Facebook", Shkëlzen Gashi ka prezantuar trofeun e "Lojtarit të Vitit". "Çfarë sezoni i jashtëzakonshëm! Ne, si skuadër kemi arritur rekord pas rekordi dhe tashmë unë personalisht kam marrë edhe një çmim special prej fansave tanë: 'Lojtari i Vitit'. Ju falënderoj shumë! Është nder i madh për mua", ka shkruar Gashi në faqen e tij në rrjetin social.