Liga Ballkanike, transfertat janë “tabu” për Tiranën

Hysenagolli më i miri, 20 pikë dhe 10 topa në tabelë

Tirana në basketboll për meshkuj pëson humbjen e dytë radhazi në Ligën Ballkanike, ndërsa u mposht dje në transfertën malazeze të Nikshiqit 77-61 nga Sutjeska. Perioda e parë nis me tri pikë për malazezët nga Saliç, por i përgjigjet Hysenagolli me dy kosha radhazi për dy pikë. Pas minutës së katërt, ku loja ishte e ekuilibruar, nis edhe shkëputja e bardhebluve 17-12 falë Laskut dhe Hysenagollit që janë "snajper" për tri pikë, ndërsa Rame bën diferencën me asistet e shërbyera. Por tanët "dehen" nga kjo epërsi e pjesshme dhe janë rivalët që bëjnë rokadën 18- 17 me Peroviç dhe Saliç duke e nxehur më tepër lojën. Megjithatë kryeqytetasit nuk vonojnë dhe rikthejnë edhe një herë tjetër avantazhin 23-19 pas dy sulmeve me autor Gavranik dhe amerikanin Rame. Vogli ka një mundësi të fundit për tri pikë, por pa rezultat dhe ky minutazh mbyllet në favor të Tiranës 23-21. Një asist i Laliç kthehet në kosh nga Gajoviç dhe sërish ka ekuilibër në shifra me fillimin e periodës së dytë. Rame i futur në vend të Laskut bën "show" për tri pikë dhe i jep kryesimin skuadrës, 27-25. Loja në vazhdim dhuron një seri rikuperimesh nga të dyja kampet, por pa mundur të sigurojnë një avantazh komod. Të zotët e shtëpisë fitojnë sërish terren. Dy minuta nga fundi ata janë më të organizuar dhe marrin "arratinë" në +15 pikë (47-32). Tri pikë

frymëmarrje për Tiranën me autor Gjyzelin. Provon edhe Lasku me specialitetin e tij, por nuk finalizon. Sekondën e fundit të periodës, Hysenagolli shënon dy pikë dhe pjesa e parë mbyllet me kryesimin e Sutjeskas 50-37. Në periodën e tretë Tirana ka një ngërç psikologjik që reflektohet edhe në gabimet në finalizim, ndërsa

Sutjeska administron rezultatin 58-45. Rame dhe Karaj janë të pasaktë për 2 dhe 3 pikë. Pas shumë tentativash të të besuarve të trajnerit Petrovski, Gjyzeli "thyen akullin" për tri pikë pasi kishte gabuar tek e mëparshmja nga e njëjta distancë. Një mbyllje perfekte i bën kësaj periode Lasku, i cili nuk fal për 3 pikë dhe ngushton

rezultatin në 60-53 duke ringjallur shpresat te të tijtë. Në periodën e fundit, Tirana provon me të gjitha forcat, megjithatë has rezistencën e malazezëve që e fitojnë këtë takim me rezultatin e përgjithshëm 77-61. Sfida e radhës e Tiranës në Ligën Ballkanike është ajo ndaj Karpos Sokoli 2000 në 9 nëntor në Shkup.