Kaosi me fushat e reja, masakrohet “Elbasan Arena”
Keqmenaxhimi, mbyllen stadiumet “Loro Boriçi” dhe “Selman Stërmasi”
Infrastruktura është një aspekt për të cilin është investuar së fundmi në futbollin shqiptar, mirëpo nuk ka ende një zgjidhje sa u përket stadiumeve dhe sistemimit të klubeve për ndeshjet e tyre. Aq më keq që edhe ato pak stadiume që kanë fusha të ndërtuara rishtas dhe me cilësi të lartë ( të paktën siç pretendohet) po keqpërdoren në mënyrën më të rëndë të mundshme. Nëse dy javë më parë "Selman Stërmasi" priste një ndeshje çdo dy ditë, e njëjta situatë po përsëritet me "Elbasan Arena"- n. Shkatërrimi
Të premten luhet Elbasani-Sopoti, të dielën Partizani-Skënderbeu, të hënën Tirana- Vllaznia. Të gjitha në një stadium, në "Elbasan Arena". Brenda katër ditësh do të zhvillohen plot tri takime në impiantin e qytetit të Elbasanit, duke pasur kështu një fluks të jashtëzakonshëm për këtë javë, për shkak të problemeve me stadiumet e kryeqytetit. Një situatë aspak normale kjo për një stadium, pasi në këtë mënyrë rrezikohet që të dëmtohet edhe tapeti i këtij impianti modern, i cili duhet thënë se edhe pas dy vitesh, kur hapi dyert për herë të parë, është mbajtur në kushte shumë të mira. Mirëpo, ky fluks ndeshjesh në vetëm pak ditë mund të sjellë dëmtime edhe në këtë sektor, ndonëse deri më tani ia ka dalë që të mirëmbahet më së miri. Në situatat e ngjashme gjatë javëve të kaluara, Elbasani është përzënë nga shtëpia e vet, për të hapur "krahun" për skuadrat e tjera që do të luanin në këtë impiant. Kësaj here, për fat të mirë, verdheblutë nuk janë degdisur diku tjetër, por është vendosur që të luajnë në këtë stadium, pasi sfida me Sopotin është afruar për të premten. Gjithnjë nëse deri orët e fundit nuk do të ketë ndryshime të tjera për sa i përket ditës së ndeshjes, sepse nuk i dihet se çfarë mund të ndodhë dhe verdheblutë mund të konsiderohen sërish si të "njerkës" në shtëpinë e tyre. Një shkatërrim total edhe i një stadiumi me parametrat më të mirë, për shkak të keqmenaxhimit.
Moti
Mësohet se një faktor kyç në dhënien e OK- it që në katër ditë të luhen tri takime kanë qenë edhe parashikimet për një mot të mirë gjatë fundjavës, çka sjell një dëmtim jo shumë të madh të fushës. Mendohet që gjatë këtyre ditëve që do të luhen këto tri ndeshje nuk do të ketë reshje shiu dhe nuk do të ketë probleme për PartizaniSkënderbeu dhe TiranaVllaznia, të cilat luajnë pas ndeshjes së Elbasanit me Sopotin. E paqartë mbetet situata nëse parashikimet do të ishin për një mot të vështirë dhe me reshje. Në këtë rast do të
merrej një vendim i tillë për zhvillimin e tri ndeshjeve të njëpasnjëshme në "Elbasan Arena", apo do të bëhej spostimi i ndonjë sfide. Stadiumet e mbyllura
Java e nëntë e Superiores bëhet shkas për keqmenaxhimin e një tjetër impianti në Shqipëri dhe diçka e tillë është për të ardhur keq. Në këtë javë të kampionatit, dy nga impiantet që përdoren nga skuadrat e Kategorisë Superiore janë të mbyllura. "Loro Boriçi", stadiumi i skuadrës së Vllaznisë, është i mbyllur për gati një muaj dhe do të qëndrojë i tillë deri më 12 nëntor, për ndeshjen Shqipëri- Izrael. Gjithashtu, stadiumi në kryeqytet, "Selman Stërmasi", është i mbyllur për këtë fundjavë, për shkak se po punohet me rimbjelljen e barit.