FSHF shton komoditetin, 2 mln euro për zyrat e reja
Selia e re e federatës me kushte moderne
Siç e pati njoftuar gazeta "Panorama Sport" në numrin e datës 19 korrik, Federata Shqiptare e Futbollit po bëhet gati që të ndryshojë vendndodhjen e selisë së saj në ndërtesën e kompleksit "Dinamo". Së fundmi, institucioni i futbollit është futur në fazën konkrete të miratimit të projektit për ndërtesën e re, ndërkohë që ka marrë një propozim nga studio arkitekturore për modelin si mund të jetë ndërtesa në fjalë. Gazeta "Panorama Sport" zbardh edhe detajet që do të ketë ky projekt, që nga kapaciteti i godinës, ndryshimet që do të ndodhin në ndërtesën ekzistuese, shuma financiare që pritet të investohet etj. Me të ardhurat e shumta që përfitoi falë kualifikimit të Kombëtares në Europian, Federata Shqiptare e Futbollit mund t'i lejojë vetes tashmë edhe komoditet të theksuar në zyrat e reja. Pronësia - Federata Shqiptare e Futbollit, me një vendim të disa viteve më parë, mori pronësinë e truallit mbi të cilin ishte ndërtuar "Qemal Stafa". Edhe në marrëveshjen për stadiumin e ri kombëtar që do të ndërtohet, institucioni i futbollit në vend ka një përqindje të konsiderueshme të hapësirave të përcaktuara në marrëveshjen me kompaninë e ndërtimit. Së fundmi, FSHF është duke kërkuar një tjetër pronë publike. Për të ndryshuar selinë e saj, që aktualisht gjendet e vendosur në ambiente me qira në një nga pallatet pranë Ambasadës Amerikane, FSHF ka kërkuar nga Bashkia e Tiranës që të marrë në zotërim edhe ndërtesën aktuale të kompleksit "Dinamo" që gjendet në hapësirën e Parkut Olimpik. Projekti - "Do të ristrukturohet godina. Bashkia e Tiranës do të bëjë kalimin e pronësisë së godinave ekzistuese, pa të drejtë ndryshim destinacioni, që FSHF të mund të ndërtojë zyrat e saj. Do të jetë sërish një godinë me karakter sportiv, do të krijojë një ambient rekreativ. Do të jetë projekt i gjelbër ekologjik, që do të ketë të gjitha standardet, duke nisur me mjetet alternative të sigurimit të energjisë", deklaron Arben Dervishaj, anë- tari i Komitetit Ekzekutiv në FSHF për "Panorama Sport". Detajet - Më tej, gazeta ka mësuar edhe investimin që pritet të kryhet si dhe detaje për sellinë e re të FSHF-së. Për momentin po diskutohet dhe negociohet me Bashkinë e Tiranës për formulën e menaxhimit të kësaj ndërtese. Mirëpo, FSHF në bashkëpunim me një kompaninë arkitekturore australiano- gjermane dhe arkitekt Peter Uillson do të ketë një seli të re, për të cilën pritet të investohen rreth 2 milionë euro. Një shifër e përafërt, duke qenë se momentalisht është faza e ideimit. Bëhet fjalë për një godinë katërkatëshe, e cila do të ndërtohet mbi atë ekzistuese. Kjo e fundit do të pësojë shembje ku do të jetë nevoja dhe vetëm ristrukturim në pjesë të tjera. Do të ketë, krahas zyrave për nevojat aktuale të këtij institucioni, edhe një muze shumë herë më të zgjeruar sa është sot në ambientet e FSHF-së.