Gjoka nuk pranon gabime: Kualifikohemi që ndeshjen e parë
Kukësi do të luajë sot ndeshjen e turit të dytë të Kupës së Shqipërisë ndaj Dinamos dhe trajneri Gjoka kërkon me çdo kusht kualifikimin që në takimin e parë që do të zhvillohet në Pezë. Në një prononcim për "Panorama Sport", Gjoka u shpreh: "Nuk e kemi nënvlerësuar në asnjë moment ndeshjen ndaj Dinamos, përkundrazi kemi bërë stërvitje sikur të ishte një ndeshje kampionati, duke i dhënë të gjithë vlerësimin e duhur. U kam thënë lojtarëve të mi që duhet të bëjnë maksimumin të sigurojnë kualifikimin që në ndeshjen e parë, pasi gabimet nuk na lejohen", tha trajneri. Kukësi është skuadra që ka fituar sezonin e kaluar Kupën e Shqipërisë dhe duket se objektivi i verilindorëve është që ta fitojnë sërish këtë trofe edhe në këtë sezon futbollistik. "Aktualisht jemi të përqendruar vetëm te ndeshja e Kupës, të cilën e shohim mjaft të vështirë, edhe pse luajmë ndaj një skuadre të Kategorisë së Parë. Kështu që nuk duhet të bëjmë asnjë gabim në këtë sfidë", ka vazhduar Gjoka në prononcimin e tij.
Ndërkohë që në letër ekipi kuksian është më i favorizuar, por Dinamo ka treguar se luan futboll të bukur dhe ka bërë ndeshje të mira në kategorinë inferiore.
Formacioni - Ekipet e Superiores kryesisht aktivizojnë lojtarët e rinj ose të stolit në
ndeshjet e Kupës, por një gjë e tillë nuk do të ndodhë me Kukësin. Verilindorët janë të etur për të fituar gjithçka në këtë sezon. "Sa i takon formacionit mund të konfirmoj se do të jetë një miks mes lojtarëve titullarë dhe atyre që nuk kanë arritur të gjejnë shumë hapësira
në formacion deri në këto momente. Kjo tregon se i kemi dhënë rëndësinë e duhur takimit. Gjithashtu në stol do të ketë edhe lojtarë titullarë, që do të jenë të gatshëm për këtë përballje", ka mbyllur numri një i stolit të verilindorëve. Por, edhe pse sot do të luajnë ndeshjen e Kupës, verilindorët janë duke menduar për takimin e fundjavës që do të zhvillojnë ndaj Luftëtarit në shtëpi, ku objektivi i vetëm është fitorja, për të shfrytëzuar një ndalesë të Skënderbeut ose Partizanit që luajnë ndaj njëra-tjetrës. Armand Halili