Devolli: Mendojmë Superioren, në Kupë shkojmë sa më larg

Me 15 pikë të plota në pesë ndeshje Kamza është një nga skuadrat kryesore të grupit A në Kategorinë e Parë, që synon ngjitjen në Superiore. "Rezultatet e deritanishme kanë ardhur pas një pune sistematike e të vazhdueshme. Madje që në verë, kur nisëm fazën përgatitore, kemi biseduar me presidentin Naim Qarri për synimet dhe objektivat e klubit tonë për sezonin e ri. Duke qenë se objektiv është ngjitja në Superiore, ne u morëm me ndërtimin e skuadrës së re. Të gjitha këto bënë të mundur që ne të jemi këtu. Por, kemi edhe mundësi që të përmirësohemi ende si në fazën mbrojtëse ku kemi pësuar gol nga goditje standarde, por edhe në fazën sulmuese ku duhet të shënojmë më shumë. Çdo ditë jemi duke u stërvitur që të korrigjojmë sa më shumë nga loja jonë", është shprehur në një prononcim për "Panorama Sport" trajneri Bledar Devolli, që pranon se rikthimi i Kamzës në elitë nuk është aspak i lehtë. "Unë si parim kam që nuk shikoj kundërshtarin, po vetveten. Çdo gjë mundohemi ta kërkojmë pengesën te vetja jonë dhe jo te kundërshtari. Nëse ekipi im i bën të gjitha gjërat mirë si në mbrojtje edhe në sulm, është e padiskutueshme që nuk ke kundërshtar. Unë nuk shikoj rival te grupi ynë. Rruga është e gjatë dhe e vështirë, çka kërkon më shumë punë e përkushtim", tha trajneri që komentoi edhe ndeshjen e sotme të Kupës ndaj Vllaznisë. "E kam thënë dhe herë të tjera, ne synojmë të shkojmë sa më lart. Ne në çdo ndeshje qoftë kampionati apo Kupe hyjmë në fushë për fitore. Ne do t` ia bëjmë hyzmetin edhe Kupës, pasi kemi 22 lojtarë në dispozicion dhe në Kupë ka hapësira për aktivizimin e të gjithëve", ka mbyllur Devolli. Abdulla Dushku