"Skënderbeu, testi më i mirë për Apoloninë para takimit me Dinamon"
Apolonia do të luajë sot ndeshjen e parë të turit të dytë të Kupës me Skënderbeun. Fierakët vijnë në këtë sfidë pas momenteve jo të mira që po kalojnë në kampionat si rrjedhojë e një ngërçi psikologjik pas mungesës së rezultateve. Gjithsesi, ky kompeticion ka një specifikë tjetër dhe pritet të mos ketë ndikimin e kampionatit. Në një prononcim për "Panorama Sport", futbollisti i dalë nga akademia fierake, Xhek Kondakçi, u shpreh: "Është një ndeshje ndaj një kundërshtari të vështirë si Skënderbeu, por që vjen në kohën e duhur për ne. Vërtet që nuk po kalojmë një periudhë të mirë, pasi kemi mungesë rezultatesh në kampionat. Sfida ndaj Skënderbeut do të jetë dhe një provë gjenerale përpara ndeshjes së kampionatit me Dinamon. Kupa është tjetër kompeticion dhe specifikë ndryshe. Ne duam të bëjmë një paraqitje sa më dinjitoze, pse jo të arrijmë dhe një rezultat të suksesshëm, pasi një gjë e tillë do të ndikonte pozitivisht në rritjen e moralit dhe të anës psikologjike, nga e cila po vuajmë. Jemi të ndërgjegjshëm se s'do të jetë e lehtë, pasi përballë do të kemi ekipin kampion dhe që kryeson Superioren. Ne e kemi vlerësuar maksimalisht dhe jemi të motivuar për të bërë më të mirën e mundshme në fushën e lojës". Dinamo - Më tej, ai ka folur dhe për ndeshjen e radhës në kampionat kundër Dinamos. "Nuk po kalojmë momente të mira në kampionat ku në disa takime nuk kemi pasur as fatin me vete. Kjo ka ardhur më shumë jo vetëm nga mangësitë tona, por dhe nga ngërçi psikologjik që po kalojmë. Unë jam i bindur se do të dalim shumë shpejt nga kjo situatë. Do të luajmë një sfidë të vështirë me Dinamon këtë fundjavë dhe e kemi kategorikisht të ndaluar të bëjmë një tjetër hap fals. Ndaj sfida me Skënderbeun për Kupë do të jetë testi më i mirë për ndeshjen e fundjavës me Dinamon", përfundoi mesfushori fierak, Xhek Kondakçi. Mikel Mbriçaj