“Mesdhetaret”, Gjoza sfidon KOKSH-in: Kostumet i qepim vetë
“Duhet të përmirësojmë imazhin pas Olimpiadës”
Skandalet që përfshinë Kombëtaren shqiptare olimpike në "Rio 2016" kanë sjellë edhe reflektim nga zyrtarët e sportit që të tilla episode të mos ndodhin më. Në kuadër të pjesëmarrjes në Lojërat Mesdhetare "Tarragona 2017", u zhvillua takimi i tretë me drejtuesit e federatave shumësportëshe në prezencë të presidentit dhe sekretarit të përgjithshëm të Komitetit Olimpik, Viron Bezhani, dhe Stavri Bello. Në këtë takim, Bezhani u kërkoi përfaqësuesve të Federatave Sportive të merrnin masat e duhura dhe të përzgjidhnin sportistët e tyre për t'u përfaqësuar në Lojëra. Njëherësh për drejtuesit e federatave u dhanë informacione në lidhje me kuotat e pranimit dhe kushtet e pjesëmarrjes. Një çështje jo pak e diskutuar ka qenë pajisja me uniforma në kohën e duhur, ku më e penalizuara ka qenë së fundmi peshëngritja pas mungesës së Evagjeli Veli në parakalimin në "Rio 2016". Që kjo të mos ndodhë më, presidenti i Federatës, Elez Gjoza, tha për "Panorama Sport" se i kërkoi kreut të KOKSH-it që këtë zë ta mbulojë personalisht. "Për të përmirësuar imazhin e Kombëtares shqiptare kam marrë përsipër si president i federatës që, nëpërmjet mbështetjes të sponsorëve dashamirës të sportit, të pajis me uniformën zyrtare të gjithë delegacionin kuqezi që do të jetë pjesëmarrës në Lojërat Mesdhetare. Të gjithë jemi dëshmitarë të asaj që na ndodhi në Rio. KOKSH-it i
kërkuam vetëm logon dhe stampimin e sponsorit në fanellë", u shpreh Gjoza. Sa u përket objektivave si federatë, Gjoza shprehu bindjen se do të fitojnë 15 medalje në total dhe do të zënë vendin e parë në renditjen ekipore. Sipas federatës, kandidatët e përzgjedhur nga
shtanga për Lojërat Mesdhetare janë Romario Avdiraj, Brikenc Calja, Daniel Godelli, Sopot Sula, Krenar Shoraj, Erkand Qerimaj, Edison Elmazi, Ermand Tabaku, Emanuel Lushi, Endri Karina, Romela Begaj, Evagjeli Veli, Ana Jovani dhe Shqiponja Brahja.