Zidan: Dua ta fitoj Kupën, Ronaldo do shpërthejë
Zinedin Zidan ka deklaruar se nuk ka ndër mend të ndryshojë treshen Ronaldo-Benzema-Bejl në kampionat, ndërkohë që për ndeshjen e sotme pritet të ketë rrotacion masiv, pasi i ka lënë yjet e ekipit në shtëpi.
Jeni të motivuar mjaftueshëm në Kupën e Mbretit? Sigurisht, është një kompeticion që unë dua ta fitoj dhe lojtarët gjithashtu. Do kërkojmë të fitojmë të gjitha ndeshjet që na presin në këtë kompeticion.
Do të bëni rrotacion, duke qenë se luani me një rival modest? Të shohim. Unë kam grumbulluar vetëm 16 lojtarë ... Si e komentoni gjestin e Ronaldos te goli i Moratës? (Qesh) Ne mundohemi të përqendrohemi vetëm te puna jonë. Ka gjëra jashtë që nuk kontrollohen dhe as nuk ia vlen të komentohen. Të gjithë jemi këtu për të ndihmuar Realin që të fitojë. A ju shqetëson fakti që Kristiano nuk po shënon? Kam folur me të për të tjera gjëra dhe jo për golat, pasi nuk më shqetëson aspak kjo gjë. E di që ai do të shënojë shumë shpejt, madje edhe 2- 3 gola brenda një ndeshje. Ka ndikuar te Ronaldo fakti që e vërshëllyen tifozët? Unë nuk i kuptoj. Gjithsesi, është një fenomen që ndodh shpesh. Edhe mua më kanë vërshëllyer. Kristiano e di se çfarë duhet të bëjë dhe kjo nuk lidhet me faktin që duhet të bindë tifozët, pasi ai nuk ka nevojë për t'i treguar askujt sa vlen. A është e paprekshme treshja Ronaldo-Bejl-Benzema? Që ditën e parë që kam marrë këtë detyrë ma kanë bërë këtë pyetje dhe vazhdojnë ta bëjnë. Ata janë tre fenomenë që meritojnë të jenë në fushë nga minuta e parë. Nuk ka të bëjë me statusin "të paprekshëm", por me cilësinë. Do të luajë i riu Mariano? Ai është pjesë e ekipit të parë dhe kjo tregon se ka vlera. Për të tjerat, do t'i tregojë koha.