Bajerni blindon Levën
Polaku do fitojë 15 mln euro, Riberi dhe Roben nënshkruajnë për dy vite
Bajerni i Mynihut u ka dhënë një tjetër leksione konkurrentëve miliarderë të Europës. Rekordmenët gjermanë gëzojnë financa dhe politika të shëndetshme për të përmbushur planet dhe strategjitë e tyre në çdo aspekt. "Nëse nuk do Bajerni, askush nuk ikën nga Mynihu", pati thënë Rumenige dhe Uli Hënes vite më parë. Dhe, në fakt, kështu ka ndodhur edhe me Robert Levandovskin. Edhe pse u përfol shumë për një parakontratë mes Levandovskit dhe Realit, gjithçka paska qenë e rreme. Milionat e Realit janë barazuar me zero nga qëndrimet e drejtuesve bavarezë. Sulmuesi polak ndihet shumë mirë në Mynih dhe ka mbështetje maksimale nga drejtuesit e klubit. Siç raporton portali serioz polak "WP SportoweFakty" dhe konfirmuar nga gazetat gjermane si "Sportbild" dhe "Tz", Robert Levandovski ka arritur marrëveshje për të rinovuar kontratën edhe për dy vite të tjera. Mediat kanë zbuluar këtë akord, por të dyja palët nuk e pranojnë zyrtarisht. "Nuk mund t'ua konfirmojmë rinovimin e kontratës", reagoi agjenti i Levës, Maik Bartel për "Tz". Kontrata e tij skadonte në vitin 2019 dhe e reja do jetë e vlefshme deri në vitin 2021. Kjo kontratë e shndërron polakun lojtarin më të paguar të Bajernit së bashku me Mylerin. 28vjeçari do përfitojë 15 milionë euro në vit. "Sportbild" ka zbuluar që dy drejtuesit Rumenige dhe Dresen kanë takuar pothuajse çdo muaj dy agjentët e polakut, Kuharskin dhe Bartel. Me rinovimin e Levandovskit, numri i lojtarëve me kontrata afatgjatë shkon në tetë pas Boateng, Myler, Alaba, Humels, Nojer, Sançes dhe Martinez. Ndërkohë "Sport1" ka zbuluar se, pas asamblesë së përgjithshme më 25 nëntor kur do të zgjidhet dhe Uli
Hënes president, bashkë me kontratën e re të Levës do bëhen publike dhe rinovimet e kontratave të Riberisë dhe Robenit. Dy mesfushorëve u skadon kontrata në fund të sezonit dhe do rinovojnë për dy vite të tjera, pra deri në vitin 2019.