Halili: Kemi dy linja, gjeneratorin do ta marrim
"A njoftuam? E dinte i madh dhe i vogël që do luhej derbi"
Refik Halili hedh poshtë deklaratën e OSHEE-së, ndërsa në një prononcim të dhënë për mediat thotë se stadiumi furnizohet nga dy linja. Megjithatë, presidenti pranon se nuk kanë bërë njoftim. Mungesa e gjeneratorit është problem, por ai thekson se në vazhdim do ta marrin një të tillë. "E rëndësishme është që gjithçka u mbyll pa incidente. I falënderoj shumë që të dyja tifozëritë, në veçanti bardheblutë, që treguan që janë qytetarë Tirone. Me ikjen e dritave, mund të ndodhte çdo gjë. Ishim të trembur. Por, falënderoj policinë, që u tregua e kujdesshme. Sa i përket energjisë, kur u ndërtua stadiumi, unë kam bërë një kabinë elektrike me financat e mia. Kërkova ndihmë, pa përmendur emra, pasi më dhanë një preventiv që ishte shumë i kripur. Por, më pas u detyrova që ta bëja gjithçka privatisht. Kemi marrë një furnizim dhe kemi dy linja, që vijnë nga kabina jonë elektrike. Kemi biseduar edhe për ndeshjet e tjera, por edhe për derbin. Na thanë që ka siguri, pasi kemi dy furnizime. Një që vjen nga nënstacioni i Selitës dhe një tjetër nga hotel 'Tirana'", u shpreh fillimisht Halili.
Furnizimi - Kur u pyet për OSHEE-në, e cila tha që klubi nuk i kishte njoftuar, ai tha. "Është gjithçka e verifikueshme. Këto dy furnizime më kanë thënë që japin garanci. Kam komunikuar dje (pardje) me specialistë të mirëfilltë të OSHEE- së dhe më kanë thënë që është një rast i çuditshëm dhe që nuk e dinë se si ndodhi kjo. Nuk mbetet gjë tjetër veçse në vazhdim mos t'ia lëmë topin njëri-tjetrit dhe të marrim një gjenerator dhe ta
kemi të pranishëm në stadium, edhe pse ka një kosto shumë të lartë. Sa u përket shkresave, a ka pasur apo jo, do të them vetëm një gjë, që edhe vetë CEZi e di shumë mirë. Kur bëmë instalimet, më kanë telefonuar drejtuesit të lartë, duke më thënë se 'nëse kjo pagesë nuk bëhet urgjent, ju as sot s'do keni drita'. Kjo është histori e para një muaji. Ajo pagesë u bë dhe është e dokumentuar. Kemi një preventiv nga Nish-Elektriku, që na ka dhënë një propozim për ndërtimin e kabinës, që ne e bëmë privatisht. Pastaj, sa i përket pjesës që ne nuk kemi njoftuar, unë do ju kujtoj të
gjithë se këtu para stadiumit ka qenë motori gjenerator i vetë elektrikut. Dhe për këtë i falënderoj, por ai gjenerator furnizon vetëm tribunën. Falë edhe mediave, e dinte i madh dhe i vogël që luhej një ndeshje".
Barazimi - Tjetër derbi pa fitore, megjithatë presidenti nuk e bën dramë, ndërsa evidenton se ekipi është në rrugë të mbarë. "Skuadra është drejt objektivave, po vazhdon rrugëtimin. Ndeshjet t'i marrim me radhë. Do ishte mirë të fitonim vetëm për tifozët. Por shpresoj që në derbin e radhës situata të ndryshojë", përfundoi Halili.