Demiraj: Boll kemi lënë pikë, i mundim peqinasit

Apolonia do të kërkojë sot fitoren ndaj Shkumbinit, një kundërshtar që i shkaktoi humbjen e parë për këtë kampionat, pikërisht me shifrat 1-0 në Peqin pas golit të Llucës. Në këto kushte, takimi i sotëm në stadiumin "Loni Papuçiu" konsiderohet edhe si një lloj hakmarrjeje. Trajneri fierak Elidon Demiraj, në bisedën për "Panorama Sport", shprehu bindjen se skuadra e tij do të marrë tri pikë. "Jemi përpara një sfide të vështirë, pasi Shkumbini ka një ekip të fortë. Këtë e ka treguar në ndeshjet e zhvilluara deri më tani, teksa me meritë renditet në vendin e katërt. Kjo na bën që jo vetëm ta respektojmë, por edhe ta vlerësojmë si duhet. Gjatë ditëve që kemi pasur në dispozicion, kemi punuar me skuadrën intensivisht për të korrigjuar edhe ndonjë mangësi të shfaqur në ndeshjen e kaluar, kryesisht në aspektin mbrojtës. Apolonia në çdo ndeshje hyn për të fituar, ndaj edhe me Shkumbinin nuk ka përjashtim, pasi do të kërkojmë vazhdimësinë. Mjaft pikë kemi lënë në fazën e parë, tashmë ka ardhur koha t'i rikuperojmë me shpejtësi", është shprehur Demiraj. Mikel Mbriçaj