Iliria, me dy mungesa titullarësh

Iliria do të luajë sot në një transfertë të vështirë në Mamurras ndaj skuadrës vendëse. Ekipi i drejtuar nga Pëllumb Ziri mori dje ngarkesën e nevojshme dhe sot do të përballet me mamurrsakët. Në një prononcim për gazetën, tekniku i skuadrës, Ziri, deklaroi: "Luajmë me një kundërshtar të barabartë, ndaj të cilit e kemi detyrë të fitojmë. Ne nuk kemi çfarë të humbim më dhe do të luajmë shanset tona". Në takimin e sotëm, tekniku nuk ka në dispozicion kapitenin Doçi, i cili mungon për shkak kartonësh, si edhe Takun, i cili ka pësuar tërheqje. Iliria po kalon një krizë rezultatesh dhe nuk do ta ketë aspak të lehtë në sfidën e sotme, për më tepër me dy mungesa të rëndësishme. Shkëlqim Hasani