Shënkolli nuk e mendon dështimin

Lezhjanët e Shënkollit u kanë dhënë fund përgatitjeve për takimin e sotëm ndaj Burrelit që do të luhet në Shënkoll. Në një prononcim për gazetën, trajneri Alert Alcani shprehet: "Presim në shtëpi Burrelin një skuadër me tradita dhe që po ecën mirë në Kategorinë e Parë. Gjatë të gjithë javës skuadra është stërvitur intensivisht për të marrë ngarkesat e nevojshme nga të gjitha pikpamjet që të jetë e aftë ta përballojë me sukses kundërshtarin. Ndonëse jemi një skuadër e re dhe debutuese e Kategorisë së Parë, jemi në rrugë të mbarë për mbijetesë, aty ku edhe synojmë përfundimisht. Ndonëse në disa transferta edhe kemi humbur, por vetëm minimalisht, çka do të thotë se mundësitë tona janë që edhe t'i fitojmë një pjesë të mirë të transfertave. Besoj se edhe ndaj Burrelit do të marrim fitoren e radhës, pasi këtu në Shënkoll jemi ndier komodë duke i fituar gati të gjitha sfidat, përveç sfidës së parë", përfundoi Alcani. Preng Gjikola