"Italianët mund të rrinë 89 minuta në mbrojtje"

Pep Guardiola nuk harron të kthejë vlerësimet dhe lëvdatat për trajnerin Konte, por ndeshja e sotme është speciale për të, pasi do të përballet edhe me ish- lojtarin e tij Pedro Rodrigez. Guardiola ka thënë se Pedro e ka bërë një trajner më të mirë dhe është një vrasës përpara portës kundërshtare.

Konte - "Është një nga trajnerët më të mirë në botë për momentin. Unë kam mësuar shumë gjëra nga koha që kam kaluar në Itali si futbollist dhe ata nuk e kanë problem të qëndrojnë për 89 minuta në zonën e rreptësisë. U mjafton një minutë për të bërë keq. Ai pati një eksperiencë shumë të mirë në Torino dhe arriti të fitonte shumë trofe në Itali".

Kalendari- "Është shumë i ngjeshur. Jemi duke punuar 11-12 ditë pa pushim. Na pëlqen të luajmë futboll dhe të punojmë maksimalisht, por ndonjëherë edhe pushimet të bëjnë mirë. Më pëlqen t'u jap lojtarëve disa ditë pushim, por nuk mundem pasi kemi shumë ndeshje".

Pedro - "Kam punuar me të dhe është një lojtar fantastik. E vlerësoj shumë instinktin e tij përpara portës kundërshtare. Mund të them se është një vrasës. Falë punës me të jam bërë një trajner më i mirë". Ndeshja - "E dimë që do të kemi përballë një skuadër që ka shumë energji sepse nuk luan në Europë. Megjithatë, ne jemi të vetëdijshëm për forcën tonë dhe kemi besim se mund të marrim një rezultat pozitiv. Duhet të bëjmë mirë detyrat dhe të mos u lëmë hapësira në kundërsulm".