Çelsi pa frena, Konte i jep leksion Pepit
"Qytetarëve" s u mbajnë nervat, lënë skuadrën me 9 veta
Përfundon me Mançester Sitin me 9 lojtarë për shkak të kartonëve të kuq të Agueros dhe Fernandinjos pas një zënke masive në minutën e 95të, me Çelsin në festë për fitoren 3-1 në "Etihad" që u jep londinezëve suksesin e 8-të radhazi dhe publiku i bluve përshëndet Konten me një duartrokitje në këmbë. Në sektorin e tifozëve miq gjendet edhe një flamur italian: është pikërisht trengjyrëshi simboli i këtij suksesi. Çelsi triumfon falë filozofisë së vjetër të futbollit italian: shpejtësi, kundërsulm dhe cinizëm. Adhuruesit e futbollit të bukur dhe pastër nuk janë dakord, por nën zë e pranojnë se edhe kundërsulmi italian ka bukurinë e tij: mjafton të shohësh filmin e 3 golave për të kuptuar madhështinë. Aksione të thjeshta, me 2 apo 3 prekje, plus goditjen finale: Siti goditet dhe fundoset. Çelsi ruan kreun i vetëm, por pasi kaloi me sukses derbin me Totenhemin dhe testin "Etihad", ky kryesim është diçka më tepër se thjesht 6 pikë.
Filmi - Shqetësimet në vigjilje (skuadra u grumbullua në akademinë një hap larg stadiumit) të Guardiolës u rikonfirmuan nga zgjedhja për të përdorur modulin e pazakontë 3-4-3 për të përballuar Çelsin. Në pjesën e parë zgjedhja funksionoi. Siti kontrolloi situatën, duke shpërdoruar me Agueron 21' (reflekse të shkëlqyera të Kurtuasë) dhe sërish me argjentinasin pak më vonë. Një shpatull e Luizit ndaj Agueros provokoi pakënaqësinë e parë me Guardiolën që kërkonte faull si lojtar i fundit dhe kartonin e kuq të brazilianit. Goli erdhi në minutën e 45-të pas një krosimi të Navasit në sulmin e radhës në krahun e majtë të Çelsit dhe me Alonson në vështirësi të dukshme: Kejhill kërkoi të bllokonte topin, por arriti vetëm ta dërgonte në rrjetën e Kurtuasë.
Epilogu - Pjesa e dytë nis me një shpërthim të Sanesë dhe goditje të De Brujnes pritur nga Kurtua. Në minutën 57, sërish nga një avancim i Navasit, De Brujne godet traversën vetëm një metër larg. Çelsi i dorëzuar, por siç ndodh shpesh në futboll, mjaftoi një frymëmarrje për të ndryshuar erën. Pas një ore lojë, top i gjatë i Fabregasit, kontroll i shkëlqyer i Kostës, i cili driblon Otamendin dhe firmos ekuilibrin. Një rikuperim fantastik i Mosesit shmang telashet për miqtë në 66'. Guardiola në këtë pikë hedh Klishinë në vend të Sanesë për të forcuar krahun e majtë të mbrojtjes së Sitit, por pikërisht pas një minute nga ai krah, lind edhe avantazhi i Çelsit. Aksion vertikal me tri takime: Hazard për Kostën, asist për Uillian dhe e djathta precize e brazilianit.
Luiz dhe Uillian festojnë me shiritin me ngjyrat e Çapekoenses për të kujtuar tragjedinë e skuadrës braziliane. Vijojnë ndërrimet dhe në minutën e 90-të vjen trisi i Çelsit: top i gjatë i Alonsos, shpërthim në hapësirë i Hazardit që shtyn në mënyrë perfekte topin me kokë
dhe nuk fal. Zënka e 95' për një faull me këmbën ngritur të Agueros ndaj Luizit i përfshiu të gjithë lojtarët dhe stafin për të rikthyer qetësinë. Skena filmi "estern" dhe dy kartonë të kuq për Sitin: Agueron dhe Fernandinjon. Për të dy priten sanksione të rënda.