Barazim i çmendur, katër penallti në Fushë-Krujë
Katër penallti, katër gola, një barazim i "çmendur" dhe një lojtar në spital. Përballja e djeshme mes Sopotit dhe Pogradecit i ofroi të gjitha. Një sfidë e veçantë që prodhoi katër gola dhe një lojë të luftuar deri në sekondat e fundit nga të dy ekipet.
Ndeshja - Loja nis e shpejtë për miqtë ku që në fillim Bangora shfaqet rrezikshëm në zonën e Sopotit, por topi kalon ngjitur me shtyllën pingule. Në minutën e 18-të vjen edhe rasti i parë i ndeshjes dhe i përket Pogradecit. Në të 23-ën ka një aksion të Sopotit nga e djathta dhe topi përfundon te Mitraj që fiton duelin me një mbrojtës mik dhe mes tyre ka kontakt duke bërë që arbitri që është shumë pranë aksionit të sinjalizojë për 11-metërsh. Nga pika e bardhë godet Çota, por pret Mali duke e devijuar në goditje këndi. Në të 34ën, Kaloshi krijon hapësirën e nevojshme në të majtë dhe kroson në zonë aty ku portieri Bejte grushton topin, por nga përplasja me sulmuesin mik, Pengu, ky i fundit dëmtohet keq në këmbën e djathtë. Ndërsa, në fund të pjesës së parë, miqtë mbeten me dhjetë lojtarë pasi ndëshkohet me të kuq Topllari pasi shan gjyqtarin. Pjesa e dytë nis mirë për librazhdasit. Në të 52-ën është Mitraj që shënon nga pika e bardhë. Dhe shtatë minuta më pas, është sërish sulmuesi i Sopotit që dyfishon. U duk se gjithçka përfundoi, por në të 63ën është Jahaj që shënon golin e parë për miqtë me penallti. Dhjetë minuta më pas, mesfushori pogradecar realizon edhe golin e dytë dhe të barazimit po me 11metërsh. Rezultati mbetet i pandryshuar deri në fund. Ekipet ndajnë nga një pikë pas sfidës së djeshme. Shkëlqim Hasani GOLAT: Mitraj 52'(p), 59'/ Jahaj 63'(p), 73'(p)
SOPOTI: Bejte, Sulejmanaj, Pashaj, Sykaj, Kaloshi, Çaushaj, Muçollari, Mumajesi (Polisi 74'), Mitraj, Bakiu (Hoxha 77'), Çota. ( Në dispozicion: Beshiri, Shero, Zorba, Tadjong). Trajner: A.Malluta POGRADECI: Mali, Pura, Kllogjeri, Çerepi, Pere, Jahaj (Hidri 90+2'), Topllari, Liçkollari, Shkulaku, Bangora (Zeqollari 87'), Pengu (Konte 36'). ( Në dispozicion: Lamellari, Çela, Yzellari, Konte). Trajner: F.Fetollari KARTONË TË VERDHË: Mumajesi 62', Bakiu 73', Sykaj 79'/ Topllari 20'
KARTON I KUQ: Topllari 45+5'(2v) GJYQTARË: E.Bastari, R.Shaba, B.Mesi, K.Barjamaj (Tiranë) VËZHGUES: Sokol Jareci DELEGAT: Endri Hyka