Juve, Milan, Inter dridhen nga skandali fiskal
Vetëm dy ditë më parë, revista e përjavshme gjermane, "Spiegel", lëshoi "bombën". Një njoftim në faqen e internetit ka bërë me dije se duke filluar nga sot dhe në javët në vazhdim, do të publikohen fakte tronditëse mbi evazionin fiskal galopant në botën e futbollit, duke filluar me dy emra të mëdhenj, Kristiano Ronaldo dhe Mesut Ozil. Sajti i njohur "Football Leaks", që publikon informacione financiare nga bota e futbollit, i ka vënë në dispozicion revistës së njohur gjermane një sasi të dhënash prej 1.9 terabajtësh, që përmban 18.6 milionë dokumente, ku përfshihen kontrata origjinale futbollistësh, marrëveshje sekrete, postë elektronike, tabela Excel dhe dokumente Word. Gjatë 7 muajve të kaluar, një skuadër e punonjësve të "Spiegel", së bashku me rreth 60 gazetarë të Rrjetit Europian të Bashkëpunimit Investigativ, kanë analizuar rrjedhjen më të madhe të informacionit në historinë e sportit. Në listë nuk mungojnë edhe personazhe të tjerë të botës së futbollit, si Zhoze Murinjo apo klubet italiane, si Juventusi, Interi, Milani, Roma, Napoli dhe Torino. Klubet - Duke nisur nga 4 dhjetori, do të nisin publikimet e dosjeve sekrete. Por nuk do të jenë vetëm futbollistë apo trajnerë ata që pritet ta pësojnë. Lajmërohet se klube të fuqishme të kontinentit do të kenë gjithashtu probleme me dokumentacionet që do të publikohen, pasi vërtetohet që edhe prej tyre ka pasur evazion fiskal. Përveç klubeve italiane të sipërpërmendura, ka edhe nga kampionate të tjera elitare. Por gjithçka do të zbulohet nga sot e në vazhdimësi...