Bursat olimpike, Tola dhe Mëhilli përfitojnë 1 dollarë
Do të zhvillohet nesër, në orën 12:30, në ambientet e Komitetit Olimpik Kombëtar Shqiptar ceremonia e nënshkrimit të Bursave Olimpike Dimërore për sportistët që do të synojnë kualifikimin në Lojërat Olimpike Dimërore "Pyeonchang 2018". Lajmi është bërë publik nga KOKSH-i nëpërmjet një komunikate për shtyp. Ndërsa nuk përmenden emrat e sportistëve, gazeta mësoi dje zyrtarisht nga Federata Shqiptare e Skive se përfitues të bursës olimpike do të jenë skiatorët Suela Mëhilli dhe Erjon Tola. Sipas KOKSH-it, programi i Bursave Dimërore konsiston në përgatitjen e sportistëve për kualifikim në Lojërat Olimpike Dimërore "Pyeonchang 2018" (Koreja e Jugut) për periudhën nga 1 nëntor 2016 deri në 28 shkurt 2018. Bursat do të ofrohen nga Solidariteti Olimpik dhe do të monitorohen me raport financiar çdo 4 muaj. "Shuma monetare e bursës është 1000 dollarë dhe konsiston në ofrimin e lehtësirave për trajnimit të duhur, trajner të specializuar në atë disiplinë sportive, kontroll mjekësor, sigurime shëndetësore në rast aksidentesh (jo ndërhyrje mjekësore) dhe buxhet minimal dhe shpenzime minimale transporti", thuhej në deklaratën për shtyp të Komitetit Olimpik Kombëtar Shqiptar. Skiatorët Suela Mëhilli dhe Erjon Tola përfaqësuan Shqipërinë edhe në Lojërat e fundit olimpik Dimërore në Soçi në 2014-ën. Të dy sportistët prej kohësh stërviten në Itali. Nëse për 30vjeçarin kjo është pjesëmarrja e katërt olimpike në karrierë pas atyre në Torino në 2006-ën, Vankuver në 2010-ën dhe Soçi, për vlonjaten 22-vjeçare kjo është hera e dytë.