Partizani, tjetër bonus nga UEFA
Pas Fondit të Solidaritetit, "demat" do arkëtojnë edhe 11.750 euro nga sezoni 2015-2016
Pjesëmarrja në Kupat e Europës mbetet një burim i pashtershëm financiar për klubet shqiptare. Pas Fondit të Solidaritetit, përfitim i cili doli me shumë vuajtje për klubet shqiptare, dje Partizani ka marrë një tjetër lajm të mirë nga FSHF, ku të kuqtë do të arkëtojnë sërish nga fondet që shpërndan UEFA. Për pjesëmarrjen në Ligën e Europës në sezonin 2015-2016, Partizani është njoftuar se UEFA ka akorduar 11.750 euro për të kuqtë nga fondi i "Fair Play"-t financiar. Ndryshe nga problematika që shfaqi shpërndarja e shumës së Fondit të Solidaritetit, FSHF është treguar më korrekte në korrespondencën me klubin e kuq për sa i përket shumës që Partizani përfiton nga fondi i "Fair Play"-t që UEFA shpërndan çdo sezon për klubet që marrin pjesë në Kupat e Europës. Të kuqtë janë informuar dje për këtë bonus financiar përmes një e-maili që federata u kishte dërguar në adresën e tyre, shkresë e cila në fund mbante firmën e Sekretarit të Përgjithshëm të FSHF-së,
Ilir Shulku. Përfitimi në fjalë, i dhënë nga UEFA, do të depozitohet në llogarinë e klubit, shumë e cila u shtohet edhe 54 mijë eurove që Partizani përfitoi së fundmi nga Fondi i Solidaritetit. Bonusi i fundit i referohet pjesëmarrjes së "demave" në turin e parë paraeliminator
të Ligës së Europës dhe me shumë mundësi nga ky fond kanë përfituar edhe Kukësi dhe Laçi që morën pjesë në të njëjtin kompeticion, si dhe Skënderbeu që mori pjesë në turet paraeliminatore të Champions-it dhe në grupet e Ligës së Europës.