Flamurtari zhyt Tiranën, Shkodra “deh” bardheblutë
Flet heroi i vlonjatëve: Luajta me kortizon, prisni surpriza
Tirana bie në Vlorë. Donjet Shkodra nderon Flamurtarin dhe u shkakton bardhebluve humbjen e dytë sezonale dhe të parën nën drejtimin e Mirel Josës. Kryeqytetasve nuk u ndahet "terri", pasi edhe dje u fikën dritat. Megjithatë, ndryshe nga "Selman Stërmasi", këtë herë "black out"-i i sekondës së 30të në stadiumin "Flamurtari" zgjati vetëm 5 minuta, pasi u vendos menjëherë në punë linja e dytë. Edhe pse kryeqytetasit e nisën mirë lojën, rikonfirmuan se janë në krizë goli. Plot 270 minuta pa shënuar dëshmojnë se bardheblutë kanë probleme në ofensivë. Shumë raste të krijuara, por në fund ndëshkohen nga e djathta vrastare e Shkodrës. Më shumë se dëshira, bardhebluve u mungoi nervi për të reaguar, aq sa në të 73-ën mbetën edhe pa Erjon Vucajn, i cili u ndëshkua me të kuq.
Pjesa e parë
Tirana e nis me vrull ndeshjen. Ka epërsi territoriale dhe sheh më shumë në drejtim të zonës së vendësve. Në të 5ën, Vucaj rrezikon nga këndorja, megjithatë Frashëri grushton dhe shmang rrezikun. Pas 3 minutash, fantazisti harkon në perfeksion një goditje dënimi, gjuajtja me kokë e Muçës kontrollohet prej portierit të vlonjatëve. Bardheblutë fitojnë mesfushën dhe i afrohen ndjeshëm golit. Në të 10-ën Vucaj jep një top për Hoxhallarin që gjuan me kokë, por vetëm ngjitur me shtyllën pingule. Pas 3 minutash është sërish shkodrani që provon nga distanca, megjithatë Frashëri tregohet i vëmendshëm duke ndalur gjuajtjen e mesfushorit të bardhebluve. Rasti më perfekt i Tiranës ishte ai të 18-ës, por tentativa e Muçës është shumë e dobët, duke i dhënë mundësi portierit të Flamurtarit të neutralizojë rrezikun. Atë që s'e bëjnë dot miqtë, e bëjnë vlonjatët. Në të 42-ën, Shehaj vertikalizon nga qendra në të majtë një top perfekt për Shkodrën, i cili me djathtën mposht portierin Lika dhe zhbllokon shifrat. 1-0 për Flamurtarin. Ky fraksion mbyllet me kuqezinjtë në avantazh dhe me Tiranën që humb Muçën. Dalja e tij bën që qendra e mbrojtjes t'u mbetet dy të rinjve Domgjoni e Deliaj. Pjesa e dytë
Mirel Josa bën një tjetër lëvizje. Moise qëndron në dhomat e zhveshjes, mesfushori dje ishte hije e vetvetes, dhe aktivizohet Gilman Lika. Shkodrani në të 51-ën shërbehet nga Cise, megjithatë gjuajtja e tij devijohet nga Beqaj. Loja është e qetë për 10 minuta, ndërsa edhe një tentativë e Alveshit nga 20 metra kontrollohet prej
Ilion Likës. Të njëjtën gjë bën edhe Frashëri në të 67-ën, pas ekzekutimit të një goditje dënimi të Vucajt. Në të 73-ën, Tirana mbetet në inferioritet numerik, pas një përplasjeje mes shkodranit të mesfushës dhe Alvesh. Kryesori Sadiku i tregon të kuqin Vucajt dhe të verdhin
sulmuesit të vlonjatëve. Edhe pse me 10 lojtarë, Tirana sheh ende përpara. Në të 77ën, G.Lika shërben për Takun, që edhe pse 2 metra larg kuadratit, nuk shënjestron siç duhet, duke shpërdoruar shansin e artë për të barazuar shifrat. Në të 80-ën, G.Lika rrezikon me
një goditje dënimi nga distanca, por Frashëri kap krahun dhe pret topin. Minutat e mbetura, por edhe shtesa nuk krijojnë panik, përveç zëvendësimeve. Fundi shoqërohet me festë te vlonjatët, ndërsa te Tirana konfirmojnë se transfertat janë kthyer në një "ferr".