"Para 10 ditësh isha dështak, FSHF-ja me dy standarde"
Sinan Idrizi ka mbetur i kënaqur nga fitorja. Në një konferencë për mediat pas ndeshjes, administratori ka shigjetuar sërish ata që kanë abuzuar me fondet e Flamurtarit. Edhe pse nuk ka folur me emra konkretë, "kambanat" binin për ish- kryetarin e bashkisë, Shpëtim Gjika. "Faleminderit futbollistëve dhe tifozëve. Sot ( dje) u respektua fanella. Nuk duhet ta kalojmë në hiperbolë ardhjen e një autobusi. Flamurtari është një legjendë. Dhe kësaj legjende, me mua ose pa mua, duhet që t'i dalin të gjithë zotë. Kur flas për të gjithë, nuk e kam për hipokritët e ' Facebook'ut, apo abuzuesit e fondeve të Flamurtarit, por për qytetarët korrektë të këtij qyteti që nuk e kanë këtë fanellë pjesë të fushatave të tyre elektorale. Nuk e kanë këtë fanellë pjesë të shout të tyre, pjesë të pasurimit të tyre. Flamurtari nuk është i Sinanit, por i vlonjatëve. Nuk barazohet ekipi i Flamurtarit me një autobus", u shpreh Idrizi. Sakaq, për "Supersport"it ai tha: "Deri para 10-15 ditëve isha një dështak, sot po flasim ndryshe. Sot ( dje) ishte një fitore e radhës, asgjë më tepër. Me pikët që na janë hequr, patjetër që do të ishim pretendentë. Kam respekt të madh për të gjithë 'ish'ët, si për Vucajn edhe për Muzakën. Pas ndeshjes, thjesht i kam qetësuar dhe jam përpjekur t'u them të jenë më të qetë. FSHF- ja me dy standarde? Çifligari ka vendosur të flasë para dhe pas Erës së Re. Federata vazhdon të veprojë me dy standarde dhe është dashakeqe ndaj njerëzve që ndërmarrin nisma kapitaliste të drejta. Kam thënë që duhet të rrimë me këmbë në tokë, por toka qëndron në ajër. Realisht nuk e di kush jam, pasi për të tretin vit radhazi paratë e mia kanë qenë të bllokuara në llogaritë e klubit. Në këto kushte është e vështirë të investosh. Privatizimi? Po presim ende Godonë. Këshilli Bashkiak pritet të mblidhet këtë javë, por thuhet se do të privatizohet vetëm stema, jo asetet. Pra unë nuk mund të investoj në stadium apo te të rinjtë dhe kjo më pengon", u shpreh pas ndeshjes për "Supersport" administratori.