Shishe Vucajt, gurë dhe stola mes tifozëve
* Vucaj u kontestua shumë nga tifozët vlonjatë gjatë daljes nga fusha, ku gjërat u ndezën edhe më shumë me sjelljen antisportive të lojtarit. Kjo solli që afër tunelit ai të goditej me shishe nga tifozët, madje edhe duke u ofenduar me ta.
* Pas ndeshjes ka pasur përplasje mes tifozëve. Tifozët e Flamurtarit kanë goditur me gurë miqtë, ndërsa tifozët e Tiranës kanë shkulur disa stola dhe i kanë hedhur në drejtim të vlonjatëve. Nuk ka pasur të lënduar, pasi policia ka ndërhyrë për të qetësuar situatën.
* Lojtarët e Flamurtarit, Zeqiri dhe Telushi, që munguan në këtë ndeshje, e kanë parë takimin nga tribuna. Ata ishin të shoqëruar nga ish-lojtari ArbërAbilaliaj, i cili nuk ngurroi të bënte edhe një batutë gjatë takimit: "Mirë që kemi Zekon që na sjell në stadium ndonjëherë".
* Në tribunën VIP, ndeshja e djeshme është ndjekur nga administratori Idrizi si dhe presidenti i Tiranës, Halili. Së bashku me ta ishte edhe deputeti Shpëtim Idrizi. Pas ndeshjes, Halili u largua i mërzitur nga stadiumi.
* Kishte interes të madh të tifozëve. Hyrja e lirë bëri të vetën në fakt. Nga Tirana kishin udhëtuar afro 300, të cilët për 90 minuta mbështetën bardheblutë, ndërsa nuk mungonin as vlonjatët, të cilët në fund festuan bashkë me ekipin.
* Mezani planifikon të largojë Shehajn në të 36-ën, për shkak dëmtimi, duke i bërë vend Fazliut. Por sulmuesi, i kthyer në mesfushor për këtë sfidë, pas disa minutash trajtim anës fushës kthehet përsëri në lojë. * Elis Bakaj dhe Erando Karabeci në tribunë. Kapiteni mungoi dje prej të kuqit, ndërsa ish-mesfushori i Tiranës ka udhëtuar drejt Vlorës për të ndjekur ndeshjen.
* Probleme për Muçën. Fakti që u aktivizua i dëmtuar i kushtoi rëndë mbrojtësit. Me largimin e tij nga fusha, shiriti i kalon Ilion Likës.
* Në të 53-ën Cise dhe Kuqi në një dyluftim përplasen kokë me kokë. Lojtari vlonjat përfundon në spital me katër të qepura...