Levandovski: Sekreti i goditjeve të mia është... Ançeloti
"Stërvitem intensivisht prej 2-3 muajsh për to"
Për të thelluar rekor din e sukseseve rad hazi në Champions në shtëpinë e tij, Bajerni iu fal këmbëve të Robert Levandovskit. Ekzaktësisht siç ndodhi në ndeshjen e fundit kundër Maincit në Bundesligë, sulmuesi polak shënoi me një goditje dënimi, thuajse nga i njëjti pozicion dhe me të njëjtën stil gjuajtje, duke mos i lënë asnjë shans portierit |blak për të reaguar. Por ndryshe nga goli në kampionat (vulosi suksesin 3-1), ky ndaj Atletikos ka sigurisht një peshë më të rëndë, pasi vendosi fatin e ndeshjes. "Teorikisht kjo fitore nuk luan ndonjë rol për fatin e kokës së grupit, por ishte e rëndësishme për vetëbesimin", thotë bomberi i Ançelotit, të cilin tekniku italian e konsideron të pazëvendësueshëm. Të paktën kështu thonë statistikat në Champions. Leva është i vetmi lojtar i Bajernit që ka startuar në të 6-ta ndeshjet e fazës së grupeve të Champions-it gjatë sezonit 2016 2017. Dhe ai ia ka shpërblyer këtë skuadrës, duke shënuar 14 gola në 12 ndeshjet e fundit në shtëpi. Vetëm një ndeshje e ka mbyllur pa realizuar.
Surpriza - Pas golit, 28vjeçari mori topin dhe e futi nën fanellë, duke ngjallur kureshtjen e tifozëve dhe mediave për gjestin: "Ishte një moment optimal për të thënë se gruaja ime është shtatzënë. Në fund të ndeshjes mora edhe topin. Ai do të jetë suveniri për Anën dhe fëmijën". Në fund, Levandovski zbulon edhe sekretin e ekzekutuesit të ri të goditjeve të dënimit në skuadër: "Unë stërvitem prej dy apo tre muajsh. Karlo Ançeloti më ka thënë se po e bëj mirë në stërvitje dhe ndaj Maincit funksionoi. Tani jam i kënaqur që po ecën mirë edhe në ndeshje. Unë i kam goditur dhe jam stërvitur gjithnjë për goditjet e dënimit, por këtë sezon jam përgatitur në mënyrë të veçantë dhe ky është rezultati".