Siti i “përgjumur”, Arda shpërthen për Barçën
Turku u bën “tris” gjermanëve, nuk mungon as... Mesi
Barcelona nuk eviton fi toret me goleadë edhe kur në fushë zbresin futbollistët që konsiderohen si rezerva. Trajneri Luis Enrike mbajti premtimin, duke bërë rrotacion në pjesën më të madhe të formacionit, me lojtarë si Vidal, Umtiti, Denis Suarez, Alkaser apo Arda Turan që nga minuta e parë. Gjithsesi, mjaftuan 16 minuta lojë që Lionel Mesi t'u tregojë gjermanëve të Mynshengladbah se nuk kanë shanse për të marrë pikë në "Kamp Nou". Argjentinasi finalizoi saktë pas një asisti të Arda Turasë. Ishte pikërisht ky i fundit që do merrte edhe statusin e "heroit" të mbrëmjes, duke realizuar plot tri herë në portën e Somerit gjatë pjesës së dytë. Një fitore që ka rikthyer entuziazmin te katalanasit, pas atij barazimi në "El Clasico". Gjithsesi, trepikëshi nuk ndryshoi asgjë në renditje, pasi fatet ishte përcaktuar që para "ekzekutimit" të ndeshjeve të fundit të grupit.
Siti - Eksperimenti i Pep Guardiolës nuk funksionoi si pritej dhe në Mançester u luajtën vetëm tetë minuta. Sëlltiku e nisi lojën me një grintë të jashtëzakonshme dhe pas vetëm katër minutash Patrik Roberts depërtoi bukur brenda zonës, duke shkundur rrjetën e Kabajeros. Ai shënoi ndaj ekipit të tij pasi është në pronësi të Sitit, por i huazuar te Sëlltiku. Gjithsesi,
reagimi i anglezëve erdhi katër minuta më pas kur Iheanaço parakaloi dy mbrojtës në shpejtësi, para se të finalizonte me një qetësi mbresëlënëse. Për 20vjeçarin ky ishte goli i 13-të, në ndeshjen e tij të 18-të si titullar i "milionerëve". Vendësit kishin zbritur në fushë me disa debutues si mesfushori Pablo Mafeo apo mbrojtësi Tosun Adarabiojo, i cili është bërë edhe lojtari
më i ri në moshë (19 vjeç e 73 ditë) që luan me Mançesterin në Ligën e Kampioneve. Pavarësisht disa tentativave të Sane dhe Nolito për të realizon golin e fitores, pjesa e mbetur e takimit më tepër dukej si e "përgjumur", sesa një rivalitet emocionues mes ekipeve. Për skocezët kjo ishte një mbyllje e ëmbël, ndonëse mbetën pa Europë, si të fundit e grupit...