Dikur kishte 1 portier, tani komandon botën
Është në qendër të kritikave dhe hetimit që po bën "Football Leaks" për kontratat e futbollistëve. Shigjetohet si një agjent që ka fshehur shumë gjëra, por në fakt ai komandon disa nga yjet më të mëdhenj të futbollit botëror. Bëhet fjalë për Zhorge Mendezin, agjenti që ka në menaxhim Kristiano Ronaldon dhe Zhoze Murinjon. Përpara disa vitesh nuk ishte askush, apo asgjë, ndërsa tani është një nga më të mirët në profesionin e tij. Që kur ishte fëmijë kishte një pasion të veçantë për biznesin. Ai ndihmonte nënën e tij për të shitur kapele në plazh, ndërsa më vonë hapi një dyqan ku shiste videokaseta. Pak nga pak filloi të ingranohej me futbollin duke transferuar portierin Nuno Espirito Santo. Më vonë bëri goditjen e madhe, duke u bërë agjenti i Kristiano Ronaldos dhe Zhoze Murinjos. Pjesa tjetër e karrierës është e gjitha një histori, që e njohin të gjithë. Transferime të çmendura të dy ikonave të futbollit, Murinjos dhe Ronaldos. Në Angli dhe Spanjë ka miq shumë të mirë dhe ruan kontakte me të gjithë presidentët, ndërsa në Serinë A nuk ka pasur shumë transferime. Në ditët e sotme, Mendez është agjenti i futbollistëve si Hames Rodrigez, Renato Sançes, Di Maria, Danilo Pereira, Tiago Silva, Andre Gomesh dhe shumë të tjerë. Prej disa vitesh, Mendez është duke fituar çmimin si agjenti më i mirë i futbollit, ndërsa konkurrenti i tij numër një është Mino Raiola. Ky i fundit menaxhon lojtarë si Pogba, Ibrahimoviç, Mkitarjan, Matuidi, Donaruma dhe të tjerë. I treti në listë është Kia, i cili ruan marrëdhënie shumë pozitive me kinezët.