Me Piolin, stërvitje shtesë dhe më shumë britma

Trajneri ka ndryshuar stil krahasuar me paraardhësin

"Gazzetta dello Sport" publikoi ditën e djeshme një artikull ku shpjegoheshin detajet që dallonin sjelljet e dy trajnerëve më të fundit të Interit. Sipas të përditshmes italiane, lojtarët ishin shumë më të qetë nën drejtimin e Frenk De Burit.

Britmat - Sipas gazetës së lartpërmendur, Pioli irritohet shumë kur lojtarët nuk zbatojnë atë çfarë ai u rekomandon gjatë seancave stërvitore. Mes të tjerash, gazeta pohon se ndryshe nga Frenk De Buri, i cili trajtonte lojtarët me më shumë respekt, italiani nuk kursen as britmat.

Shtesë - Ndryshe nga De Buri, Pioli ka detyruar lojtarët që të bëjnë orë shtesë stërvitje. Sipas "Gazzetta dello Sport", tekniku aktual nuk i lejon lojtarët që t'u drejtohen dhomave të zhveshjes në përfundim të stërvitjeve. Sipas gazetës, ai komunikon me secilin prej tyre për t'i dhënë direktivat e duhura. Shpeshherë lojtarët, pasi komunikojnë me trajnerin, stërviten në aspekte të ndryshme.

I bezdisur - Në orët e fundit, gazetat sportive italiane kanë zbuluar se Pioli është bezdisur mjaftueshëm nga deklaratat e Simeones. Sipas italianit, kolegu i tij tek Atletiko nuk bëri mirë që deklaroi se herët a vonë do të merrte vendin që sot i përket atij. Komenti i Simeones duhej përgënjeshtruar edhe nga Interi. Shoqëria, duke mos reaguar përballë fjalëve të "Cholo"-s, i ka hequr kompetencat Piolit.