Liga Ballkanike, Lasku: Synojmë një tjetër fitore
"Jemi në superformë, tashmë nuk i druhemi askujt"
Pas dy mrekullive në Ligën Ballkanike për Grupin B që bëri në transfertë me Trepçen dhe së fundi në "Asllan Rusi" "in extremis" kundër Pejës, Tirana në basketboll për meshkuj ka "uri" për një tjetër triumf. Përballë bardhebluve të trajnerit Nikola Milatoviç do të zbresin sot në parket, në sallën e rinovuar "Farie Hoti", maqedonasit e Feni Industries. Kundërshtar, përballë të cilit janë mposhtur thellë në transfertë, por që për titullarin e kryeqytetasve Gent Lasku nuk ka vend për panik. Përkundrazi, sipas tij, Tirana do të tentojë sërish suksesin në arenën ndërkombëtare. Në një prononcim për gazetën "Panorama Sport, Lasku konfirmon një optimizëm në skuadër në prag të këtij takimi. "Siç e dini, kemi korrur 6 fitore radhazi në më pak se 15 ditë nën drejtimin e trajnerit Nikola Milatoviç. Realisht po kalojmë një moment mjaft të mirë, edhe pse kemi mësuar të vlerësojmë drejt çdo kundërshtar. Asgjë nuk është e lehtë apo e garantuar. Ne nuk i druhemi askujt. Në transfertë kemi zhvilluar një ndeshje mjaft të dobët, ku nuk kemi treguar forcën tonë për shkaqe të ndryshme. Por jam më se i bindur që nesër (sot) do të jetë një realitet krejt tjetër. Për më tepër që do të jemi të favorizuar nëse do të nënvlerësohemi nga kundërshtari për shkak të rezultatit të mëparshëm". Një arsye më tepër ku Lasku beson te suksesi i katërt në Ligën Ballkanike është se do të rikthehen në shtëpinë e tyre. "Pa dyshim që të luash në shtëpinë tënde është favor, edhe pse jam shumë i sigurt se Tirana do ta tregonte veten e saj në çdo fushë të mundshme". Ndërsa "fsheh" skemën me të cilën trajneri Milatoviç e ka përgatitur këtë sfidë jo pak delikate, Lasku siguroi se skuadra është përgatitur maksimalisht. "Se si është përgatitur skuadra për këtë ndeshje nuk mundem të jap detaje, por mund t'u them se jemi përgatitur mjaft mirë dhe mendojmë vetëm të korrim një fitore", e mbylli deklaratën Lasku, një potencial për kryeqytetasit, që këtë sezon nuk njohin limite. Pas gjashtë ndeshjeve të luajtura në Ligën Ballkanike, Tirana mban vendin e dytë me 9 pikë (tri fitore dhe tri humbje), me pikë të barabarta me kryesuesit e Sutjeskas.