“Bomba” e UEFA-s: Do ta dënojmë sërish Skënderbeun
Zyrtari sqaron: Vendimi i KAS-it na hapi rrugën për masa drastike
Dënimi i Skënder beut me mospjesë marrjen në Ligën e Kampioneve për edicionin 2016-2017 ka qenë vetëm paraprak dhe së shpejti klubi korçar do të përballet me masa reale për manipulimin e ndeshjeve. Konfirmimin e ka dhënë dje një prej zyrtarëve më të lartë të UEFA-s, Emilio Garsia, i cili është shefi i Departamentit për Integritetin dhe Disiplinën në këtë institucion. I ftuar të referonte në Konventën Ndërkombëtare të Sportit në Gjenevë për çështjen e manipulimit të ndeshjeve, Garsia e cilësoi pezullimin e korçarëve vetëm "paraprak", duke shtuar se tashmë klubi shqiptar do të përballej siç duhej me drejtësinë e UEFA-s. "Organet disiplinore të UEFA-s po marrin në konsideratë masa disiplinore të vërteta", tha ai, pasi shpjegoi hap pas hapi se si kishin lindur dyshimet e ndërkombëtareve për klubin korçar, që nga ndeshjet e Ligës së Kampioneve, tek ato në Ligën e Europës, pa harruar rreth 50 ndeshje, që cilësohen si shumë të dyshimta në kampionatin shqiptar. Por pse UEFA ka vendosur të marrë masa më të rrepta ndaj korçarëve? Garsia ka shpjeguar se vendimi i dalë nga KAS-i Lozanës, i cili mbështeti këndvështrimin e UEFA- s, edhe pse të bazuar vetëm mbi luhatjet e koeficienteve dhe shumave të hedhura nga bastet sportive, i jep të drejtë kësaj organizate të caktojë një dënim që i përshtatet një klubi që ka kryer shkelje dhe krijon një precedent edhe për të ardhmen. "Kjo ishte hera e parë kur ne ishim të aftë të tregonim para KAS-it një seri të gjatë raportimesh. Shifrat nuk gënjejnë dhe luhatjet e basteve gjithashtu", shtoi ai, duke shpjeguar se gjyqtarët e Arbitrazhit Sportiv në Lozanë pranuan se monitorimi i basteve është "një evidencë e besueshme".
Rreziku
Mbrojtja e drejtuesve të Skënderbeut para opinionit publik, që pas dënimit të dhënë nga UEFA, ishte e bazuar pikërisht mbi faktin se pezullimi kishte qenë 1-vjeçar, duke e cilësuar gjithçka si aludim dashakeq dhe të pamotivuar. Të njëjtin qëndrim ka mbajtur edhe Federata Shqiptare e Futbollit, duke i cilësuar aludime ato që kanë dalë nga zyrat e UEFA-s. Pas deklaratës së fundit të Garsias, një funksionar jo dosido i këtij institucioni, korçarët duhen të bëhen gati për betejën e radhës ligjore,
ndërsa FSHF të fillojë të trajtojë Skënderbeun si "shkelës", me të gjitha pasojat që përfshin ky lloj qëndrimi. Tashmë, duke iu referuar edhe asaj që ka deklaruar zyrtari i UEFA-s, rreziku është i madh dhe Skënderbeu mund të dënohet disa vite me mospjesëmarrje në kompeticionet
europiane. Kjo do të kishte pasoja, jo vetëm për klubin korçar, por në tërësi për futbollin shqiptar dhe imazhin e tij, për më tepër që bëhet fjalë për kampionen e vendit. Disa herë Skënderbeu ka përfunduar si i akuzuar për trukime ndeshjesh.