Haxhiu: Ngërç psikologjik, këto 4 javë si finale

Trajneri fillon të bëjë llogaritë e mbijetesës

Korabi futet në një fazë realisht vendimtare për Kategorinë Superiore. Vendi i fundit dhe pikët e pakta e kushtëzojnë ekipin dibran që të gjejë rrugën e kthesës, pasi ndryshe rënia nuk mund të shmanget. Një gjë të tillë e ka të qartë edhe vetë Gerd Haxhiu. Trajneri këtë e ka pranuar edhe për "Super Sport", ndërsa dje analizoi gabimet në dy humbjet e fundit. "Ndeshja në Shkodër ishte vrasëse. Jo se nuk bëmë paraqitje të mirë, por rezultati është ai që është dhe e pranojmë në heshtje. Ndaj Teutës pësuam gol në të vetmin rast dhe nuk arritëm të shënonim", u shpreh fillimisht tekniku vlonjat. Më tej, Haxhiu sqaron se, duke filluar nga Tirana, skuadra e tij do të ketë ndryshime në formacion. "Pjesa ofensive është me cilësi. Në mbrojtje jemi ndëshkuar nga gabimet individuale. Ne ndryshojmë sistem loje në çdo ndeshje, ndërsa me Tiranën më duhet të rishikoj edhe një herë formacionin, i ndikuar edhe nga mungesat e shumta që kam këtë javë. Do të vendos për një sistem tjetër dhe besoj që do të punojmë fort për të arritur rezultat pozitiv sepse 4 ndeshjet e fundit të vitit 2016 i kemi si finale", u shpreh numri një i Korabit. Ndaj Tiranës e lehtë nuk do të jetë, sidomos kur bardheblutë nuk janë thyer kurrë në shtëpi. Ai shton se rikthimi i Karabecit dhe Teqjas e forcon edhe më shumë skuadrën e Josës, por Korabi do të marrë masat për të mos dalë me humbje. "Tirana u ndëshkua në Vlorë nga një episod. Sakaq, me rikthimet e të munguarve, situata do të paraqitet ndryshe për kundërshtarin tonë", theksoi ai. Në mbyllje, trajneri dekstaf

laron se Korabi i tij po kalon një ngërç psikologjik. "Besoj se është psikologjik. Duket si mallkim sepse punohet mirë dhe me seriozitet. Nuk është se nuk prodhojmë. Në momentin e parë që kundërshtari vjen në portën tonë ne ndëshkohemi, por duhet ta pranojmë këtë situatë", përfundoi Haxhiu.