Vllaznia pa katër titullarë, ja lëvizjet e trajnerit Cungu

Bicaj dhe Krymi të pezulluar, ndërsa Gocaj e Kalaja vuajnë dëmtimet

Ndeshja e radhës ndaj Luftëtarit në Shkodër e gjen Vllazninë jo komode sa i përket kontingjentit. Pas kartonëve të verdhë të marrë në takimin kundër Skënderbeut, mbrojtësi Ditmar Bicaj dhe mesfushori Ardit Krymi kanë plotësuar numrin e tyre dhe do të mungojnë një javë. Nga ana tjetër, shqetësim për trajnerin Armando Cungu është fakti që dy titullarë të tjerë janë të dëmtuar dhe nuk dihet se kur do të rikthehen. Bëhet fjalë për mbrojtësin e krahut të djathtë, Olsi Gocaj, si dhe mesfushorin me tipare sulmuese, Arlind Kalaja. I pari ka pësuar një dëmtim në kofshën e këmbës së djathtë dhe ka lënë në mes takimin ndaj Skënderbeut. Po ashtu, Kalaja, që mungoi ndaj korçarëve, vazhdon terapinë për të kaluar dëmtimin, por ka pak shpresa për t'u riaftësuar deri të shtunën. Megjithatë, stafi mjekësor po bën gjithçka për të rikuperuar në kohë dy titullarët. E njëjta gjë mund të thuhet edhe për të rinjtë Rubin Hebaj dhe Ambroz Kapaklija,

të cilët vijojnë të jenë të dëmtuar dhe nuk do të jenë në dispozicion të Cungut kundër Luftëtarit. Gjithsesi, trajneri e ka në kokë formacionin që do të hedhë të shtunën. Me Agoviç në portë, mbrojtja pritet të përbëhet nga Pjeshka në të djathtë, Cicmil e Vrapi në qendër dhe Marku në të

majtë. Ndërsa në mesfushë, nga krahët do të jenë Çinari dhe Shtubina. Treshja e mesit të fushës do të përbëhet nga Bardulla, Tafili dhe Veitzer. Ndërsa në majën e sulmit do të jetë lushnjari Brunild Pepa. Nëse riaftësohet Kalaja, atëherë Shtubina do të jetë sulmuesi kryesor. Admir Uruçi