Shpërthen Çaço: Në Ballsh na mundën me presione
Kapiteni beratas akuzon ballshiotët, bën thirrje për kujdes në sfidën me Sopotin
Tomori ka humbur terren në javën e 12-të të Kategorisë së Parë, teksa e sheh veten të pozicionuar në vendin e 4-t me 18 pikë të grumbulluara në total. Beratasit u mundën në javën e fundit në Ballsh nga Bylisi vendës. Një sfidë jo pa tension mes dy ekipeve që kanë pasur edhe përplasje në sezonet e fundit. Ervis Çaço ishte personazhi i sfidës së fazës së parë, i cili, pas golit që i shënoi Bylisit, festoi duke ngritur dorën lart duke iu drejtuar ballshiotëve.
Çaço - Në një prononcim për gazetën, pas sfidës së të shtunës në Ballsh, Çaço u shpreh: "Vijmë pas një humbjeje aspak të merituar në Ballsh, çka të tregohemi realistë na ka mërzitur shumë. Një sjellje e pakuptimtë dhe presion në fushën e lojës nga ana e tyre, gjë që i prish imazhin një sfide 'fair play', ashtu siç duhet të ishte ajo midis Bylisit dhe Tomorit. Megjithatë, nuk dua të merrem aspak më me sfida të tilla, pasi futbollistët profesionistë duhet të jenë të tillë edhe në fushën e lojës", tha si fillim kapiteni i beratasve pas komentit të tij në lidhje me sfidën kundër Bylisit. Më tej, futbollisti Çaço është treguar mjaft i rezervuar në takimin e kësaj jave ndaj Sopotit. "Sfida me Sopotin do të jetë tepër e vështirë për ne, pasi duket se ekipi i tyre e ka gjetur formën tashmë dhe këtë gjë e tregoi në mënyrën më të mirë ndaj Lushnjës kryesuese. Duhet të përqendrohemi dhe të përkushtohemi maksimalisht ndaj tyre, ku edhe pse do të luajmë në shtëpi, përsëri mendoj se mund të na hapin probleme. Nuk mendoj se duhet të jemi aspak nën presionin e pikëve, kjo për faktin se kundërshtarët i kemi shumë pranë, duke përfshirë këtu edhe Lushnjën. Ne jemi në gjendje t'i rikuperojmë këto pikë, madje këtë gjë do ta fillojmë që në sfidën e kësaj jave, duke i treguar çdo skuadre që ne jemi këtu dhe do të luftojmë deri në fund të kampionatit për të prerë një biletë për në elitë", përfundoi Çaço prononcimin e tij. Eris Sylyku