Zbulohen emrat, Bushi te Shpresat dhe Bogdani tek U-19
Dy ish-bomberat kuqezi pritet të zyrtarizohen të premten në krye të kombëtareve të moshave
Kjo është java në të cilën do të zyrtarizohet gjithçka. Pasi ekipet U-19 dhe U-21 kanë mbetur prej më se një muaji pa trajner, Federata Shqiptare e Futbollit ka caktuar edhe dy personat që do të kenë drejtimin e tyre. Gazeta "Panorama Sport" ka zbuluar se dy emrat më të mundshëm që pritet të ulen në këto dy pankina janë ish-bomberat Alban Bushi dhe Erjon Bogdani. Menaxheri aktual i Koviteve. mbëtares pritet të vihet në krye të ekipit Shpresa, ndërsa ndihmësi i Xhani De Biazit në krye të asaj U19. Përzgjedhja dhe emërimi i trajnerëve të ekipeve kombëtare është ekskluzivitet i presidentit të Federatës Shqiptare të Futbollit. Ky i fundit e ka këtë privilegj dhe nga ai është pritur për emërimin e dy teknikëve të rinj që do të pasojnë Redi Jupin dhe Arjan Bellain. Të parit i përfundoi kontrata me Kombëtaren U-21 (ky ishte versioni i tij zyrtar i dhënë për "Panorama Sport"), ndërsa për Arjan Bellain, gazeta solli ekskluzivisht lajmin për shkarkimin e tij nga drejtori Sportiv i Kombëtareve në FSHF, Paolo Tramexani.
Prezantimi - Prej javësh janë diskutuar alternativat e mundshme për trajnerët që do të marrin drejtimin e këtyre dy ekipeve. Gazeta "Panorama Sport", nga burime brenda institucionit të futbollit ka mësuar se katër kanë qenë alternativat e fundit: Dy trajnerë shqiptarë, një italian dhe një spanjoll. Mirëpo, ekskluziviteti i kreut të institucionit të futbollit në vend ka bërë që alternativat shqiptare të përzgjidhen. Gazeta ka mësuar se të premten në orën 13:00 është programuar paraprakisht edhe prezantimi i dy trajnerëve të rinj. Në sallën e konferencave në ambientet e institucionit të futbollit pritet të zyrtarizohet gjithçka, ndërkohë që të dyja këto skuadra nuk kanë aktualisht aktivitete dhe gara kualifikuese. Gjithsesi, lënia vakant e postit të trajnerit për secilën prej tyre, lë pezull të dyja këto grupmosha. Në këtë periudhë, ka qenë vetë Paolo Tramexani, i cili ka mbikëqyrur fazën e seleksionimeve që është bërë në Shqipëri javën e shkuar dhe në Itali, këtë javë, në disa qytete të saj.