Simeone e Pioli, polemika për stolin e Interit
Italiani: Diego vazhdo ëndërro, unë nuk lëviz që këtu
Gjithçka nisi të hënën në prag të ndeshjes mes Bajernit të Mynihut dhe Atletikos së Madridit. Në konferencën për shtyp që mbajti 24 orë përpara fillimit të sfidës, trajneri argjentinas i klubit spanjoll pranoi se i biri, Xhovani, nuk kishte thënë asgjë të keqe kur kishte deklaruar të shtunën në mbrëmje se i ati një ditë do të bëhej trajner i Interit. Kaq mjaftoi për të "ndezur" mediat italiane, të cilat prej kohësh flasin për një akord paraprak të arritur mes "Mr.Suning" dhe Simeones, i cili shikohet si pasuesi ideal i Piolit.
Vazhdimi - Të martën në mëngjes, "Cholo" korrigjoi shënjestrën duke thënë se nuk kishte "prioritet" Interin, por ishte i interesuar që të kthehej te skuadrat ku kishte kaluar kohë të mira si lojtar duke futur kështu "në valle" edhe Lacion e Sevijën. Mënyra si tentoi që të frenonte entuziazmin e mediave dhe tifozëve të Interit ndezi më shumë situatën. Kështu, të martën mbrëma, Simeone, pas garës që humbi në Mynih, u prezantua edhe një herë përpara gazetarëve për t'u dhënë përgjigje aspak të sjellshme atyre që sërish e pyetën për të ardhmen në Milano. "Mos më pyesni më për Interin sepse s'flas më për këtë temë. Çfarë kam pasur dëshirë të them e
kam thënë, prandaj boll. Më bezdis fakti që secili interpreton fjalët siç do vetë. Nuk është e drejtë", tha Simeone.
Kundërsulmi - Pioli, edhe pse në rininë e vet ka qenë një mbrojtës modest, duket se kalimi në realitetin e ri (të trajnerit) e ka ndihmuar që të zbulojë një tjetër dimension. "Unë i besoj
realitetit. Unë jam trajner i Interit, ndërsa ai është i Atletikos. Të dy ne duhet që të përqendrohemi te detyra tona. Nëse ai (Simeone) ëndërron Interin, atëherë unë i them se ëndërroj që të qëndroj edhe për shumë kohë këtu", ishte përgjigjja e Stefano Piolit.
Panuçi - Përkrah Piolit,
është rreshtuar Kristian Panuçi, i cili ditën e djeshme tha se argjentinasi kishte gabuar kur kishte dhënë ato deklarata për Interin. "Nuk tregoi respekt karshi Piolit. Nëse do që të vijë në Milano, është i mirëseardhur, por tani le të mendojë për Atletikon", tha Panuçi.