Sadiku dhe Agolli duan mrekulli për një biletë
Klodian Duro për median azere: Karabaku mund të fitojë
Dy futbollistë të Kombëtares shqiptare do tentojnë vazhdimësinë në Europë pas ndeshjeve të sotme, duke qenë se luajnë kualifikimin për në raundin tjetër. Armando Sadiku është rikthyer në një formë optimale pas dëmtimit të pësuar. Madje, në fundjavë ai arriti të shënonte për Zyrihun pas një mungese 2-mujore. Sulmuesi kuqezi pritet të jetë titullar për klubin zviceran në përballjen e sotme, kur do të luajnë në transfertë ndaj turqve të Osmanlispor. E vetmja zgjidhje për të siguruar biletën është që të marrin tri pikët në këtë ndeshje, pasi çdo rezultat tjetër do t'i linte jashtë kompeticionit. Një mision mjaft i vështirë, por jo i pamundur për Zyrihun, që ka befasuar me paraqitjet e deritanishme.
Agolli - Kapiteni i përfaqësueses kuqezi do të luajë në një stadium të tejmbushur sot, në një ndeshje të cilësuar si historike për klubin e Karabakut. Azerët luajnë kualifikimin në ndeshjen e fundit të grupit, por presin një kundërshtar shumë të vështirë si Fiorentina. Agolli pritet të zbresë në fushë që nga minuta e parë dhe të ndihmojë skuadrën për të fituar, si një rezultat i domosdoshëm për të kaluar në raundin tjetër. Skenari tjetër është që Karabaku
të barazojë dhe PAOKu të mos arrijë të fitojë në duelin ndaj Slovan Liberekut.
Duro - Në portalin "azerisport.az" ka pasur edhe një deklaratë të Klodian Duros, sa i përket ndeshjes së sotme. "Kam biseduar shpesh me Ansi Agollin për Karabakun dhe më ka folur
shumë mirë. Gjithashtu ka vlerësim të madh për punën e trajnerit Kurbanov, profesionalizmin e tij dhe mënyrën se si i përgatit ndeshjet. Mendoj se do arrini të merrni një rezultat pozitiv kundër Fiorentinës. Në futboll s'ka asgjë të pamundur", deklaroi Duro për median azere.