Turqit e Zirat Bankasit, “mision i pamundur” për Studentin
“Challenge Cup”/ Humbin 3-0 në ndeshjen e parë
Skuadra kampione e Studentit në volejboll për meshkuj u mposht me lehtësi 3-0 ndeshjen e parë të "Challenge Cup" ndaj turqve të Zirat Bankasi Ankara, e luajtur në "Asllan Rusi". Një takim që respektoi parashikimet ndërsa përballë ishin dy skuadra me diferenca të mëdha. Kësisoj skuadra turke është një hap larg kualifikimit për në turin tjetër pas atij suksesi "flash". Përveç avantazhit 3- 0 në fillimin e setit të parë për të besuarit e trajnerit Arben Sako, më pas rivalët patën gjithçka nën kontroll, duke qenë superiorë edhe pse nuk luajtën me formacionin titullar. Turqit përmbysin shumë shpejt epërsinë e përkohshme të kampionëve të shqiptarë, 4-8. Savas për Zirat Bankasin është rreziku numër një për Studentin, sikurse Markus Nilson (2.08 metra) është i pamarkueshëm nga blloku kryeqytetas. Gyngor shënon nga shërbimi dhe 10- 4. 23vjeçarit mik i përgjigjet Pepaj. Studenti është inferior në topin e parë dhe në shifra 5- 12. Tekniku Sako bën shenjë për pushim për të tijtë. Xhabrahimi, më i miri për Studentin (me 8 pikë në total), është i saktë në finalizim, por i vetëm nuk mund të bëjë mrekulli. Topi i parë mbetet një minus i madh për të zotët e shtëpisë, çka detyron trajnerin Sako të ulë në stol Ramën për Andi Lundrën. Skuadra turke shkëputet vazhdimisht. E majta "rrufe" nga shërbimi për Nilson është "mision i pamundur" për Lundrën ta neutralizojë dhe shifrat thellohen 6-20. Sërish pushim për Studentin. Lundra bën një ngecje në limitet e zonës, por Zirat Bankasi e mbyll këtë set 25- 9. Formalitet edhe seti pasardhës me turqit që shkëputen që në start 7-1. Pikën e parë për tanët e shënon Rama që pasohet nga Xhabrahimi. Sako luan një tjetër kartë. Fut në lojë organizatorin e marrë hua nga Farka Volej, Deliun. Për fat të keq Studenti çon dëm edhe shërbimet. Edhe ato pikë që shkojnë për të, janë më tepër për meritë të kundërshtarëve si dhuratë nga shërbimi. Trajneri mik madrilen, Fernando Benitez ka luksin të freskojë skuadrën. Pika maratonë e 22- të për turqit mbajti firmën e Enaboifo, ndërsa krejt seti mbyllet 25-11. Studenti thjesht kryente një for-
malitet në parket edhe setin e tretë që fitohet sërish nga miqtë 25-14, takim që zgjati më pak se 60 minuta. Ndeshja e kthimit luhet më 21 dhjetor. Interesim i kënaqshëm i tifozërisë ku nuk munguan as ata miq me flamuj dhe shalle në mbështetje të ekipit skuadrës së zemrës. Madje në tribunën
VIP zuri vend deri në fundin e setit të dytë edhe ambasadori turk në vendin tonë, Hidajet Bajraktar, i cili u largua duke u përshëndetur me lojtarët e Zirat Bankasi Ankara. Fundi ishte pikant: një foto në grup, çka rikonfirmoi miqësinë mes dy shteteve.