Marseja e do Canën drejtor

Drejtuesit e rinj të skuadrës franceze i kanë bërë një tjetër ftesë ish-mesfushorit shqiptar

Nuk ka ende një lamtumirë zyrtare për lënien e futbollit, mirëpo Lorik Cana është një nga emrat që lakohet gjithnjë e më shumë për të startuar karrierë në një post drejtuesi. Së fundmi, skuadra franceze e Marsejës, pas ndryshimit të pronarëve është në ristrukturim të organikës së klubit. Plani i tyre është që të rikthejnë në klub sa më shumë nga ish-futbollistët e suksesshëm në këtë skuadër, që kanë kontribuuar prej vitesh.

Posti - Lorik Cana duket gjithnjë e më pranë Marsejës, tashmë që nuk është më pjesë e futbollit aktiv. Ishkapiteni i Kombëtares shqiptare ka marrë një tjetër ftesë nga drejtuesit e klubit francez, këtë radhë për të qenë i pranishëm në stadium gjatë ndeshjes së mbrëmjes së djeshme mes Marsejës dhe Monakos, e vlefshme për Ligën 1. Jo vetëm Cana, por ftesë kanë marrë edhe disa ish-futbollistëve të tjerë, që kanë lënë gjurmë në historinë e ekipit. Që pas kampionatit Europian, ku Cana luajti dhe ndeshjet e fundit si futbollist, ai është parë shpesh afër aktiviteteve të Marsejës, madje nuk kanë qenë të pakta herët që është folur për një aventurë të re të tijën në një pozicion në stafin drejtues. Pronarët e rinj të klubit marsejez e kanë piketuar ishkapitenin e tyre për disa sezone si një nga emrat e duhur që mund të marrë post të lartë drejtuesi në strukturën e klubit që duhet të rikthehet sa më shpejt ndër skuadrat elitare të Francës. Vetëm disa ditë më parë, Cana ishte gjithashtu i ftuar nga pronarët e rinj, një takim që u zhvillua me ish-legjendat e Marsejës, për të diskutuar rreth projekteve që mund të rikthejnë Marsejën në elitë. Megjithatë, Cana, i cili është duke ndjekur dhe kurset e

UEFA- s për trajner dhe ka arritur të marrë deri më tani licencën UEFA A, nuk i ka varur ende zyrtarisht këpucët në gozhdë. Së fundmi, vetë futbollisti ka postuar një foto në rrjetet sociale, ku shfaqet në fëmijërinë e tij me veshje tradicionale.