"Gabuam te golat në miqësore, por jemi gati për titullin"

Mbrojtësi Sodiq Atanda ka qenë titullar i padiskutueshëm te Partizani në dy fazat e para, por në miqësoret në Turqi trajneri Starova nuk i ka kursyer kritikat ndaj tij dhe repartit defensiv për golat e pësuar, që erdhën për shkak të gabimeve në këtë sektor. Ndërkaq, në prononcimin e dhënë për "Supersport", mbrojtësi Sodiq Atanda mendon se kjo fazë përgatitore në Antalia i ka ndihmuar edhe më shumë të kuqtë që të kuptojnë defektet e tyre dhe t'i korrigjojnë ato. "Faza përgatitore është një mundësi e mirë për të zhvilluar ndeshje miqësore. Gjatë ndeshjes së parë gabuam, por korrigjuam gjithçka në sfidat e tjera. Unë besoj se jemi gati për të përballuar me sukses dy fazat e mbetura të kampionatit. Ne po punojmë me intensitet dhe forcimi i skuadrës me emra të rinj në sulm do të na ndihmojë në garën për të fituar titullin. Do të jap maksimumin për këtë objektiv, sepse ne i kemi të gjitha mundësitë për t'u shpallur kampionë", deklaroi mbrojtësi Atanda. Trajneri Starova ka deklaruar se është më mirë që gabimet ndodhen në miqësore, në mënyrë që t'i rikuperojnë deri sa të nisë kampionati.