Karakaçi te Besëlidhja, Noka: Ja planet tona
Presidenti: Do ketë afrime të tjera, i bindur për elitën
Besëlidhja nuk di të ndalet në merkato dhe dje ka bërë goditjen e radhës. Klubi ka afruar mesfushorin shkodran Abaz Karakaçi që gjatë pjesës së parë të kampionatit ishte pjesë e Kastriotit. Lezhjanët kanë nënshkruar një kontratë 2-vjeçare me lojtarin që dje është vënë menjëherë nën urdhrat e trajnerit Alban Bruka. Si futbollist është formuar në akademinë "Vllaznia" dhe më pas është transferuar te Partizani në vitin 2012. Më tej, lojtari ka provuar të luajë edhe me shumë ekipe të tjera si: Ada, Butrinti, Luftëtari, Apolonia apo edhe Tërbuni në Superiore. Pas Spartak Ajazit, Karakaçi është afrimi i radhës i Besëlidhjes në merkato.
Noka - Në një prononcim për gazetën, presidenti Gjok Noka flet për planet që ka ekipi në merkato dhe garanton se Besëlidhja në fund të kampionatit do të sigurojë biletën e rikthimit në elitë. "Që në fillim të sezonit, kemi vendosur ngjitjen në Superiore dhe për këtë po punojmë edhe në merkaton e janarit. Duke parë performancën e skuadrës gjatë gjysmës së parë, ngarkova stafin teknik që me përgjegjësi profesionale të studionte të gjithë sektorët dhe të gjithë futbollistët për të evidentuar ato pika ku skuadra do të kishte nevojë për rinovim. Duke iu referuar pozicionit në renditje, ndërhyrja në merkaton e janarit ishte shumë e domosdoshme, ndaj edhe po punojmë intensivisht për ta kompletuar skuadrën me futbollistë tepër kualitativë. Sot(dje) firmosëm një kontratë 2-vjeçare me shkodranin Abaz Karakaçi dhe në vijim do të ketë të tjerë, pasi që tani po mendojmë për sezonin e ardhshëm që jam i bindur se do të luajmë në Superiore. Pjesë e Besëlidhjes, si nga futbollistët që janë nën kontratë, edhe ata që pritet të vijnë në provë, do të qëndrojnë vetëm ata që do të bindin 100%. Të gjithë lojtarët do t'i nënshtrohen një testi të përgjithshëm nga të gjitha pikëpamjet. Gjithashtu, skuadra do të luajë dy miqësore në javë që të shohim formën e çdo lojtari. Për një gjë ju garantoj, se unë nuk do të ndalem së punuari derisa Besëlidhja ta përmbushë detyrimin për ta kthyer ekipin në elitë", e ka mbyllur prononcimin Gjok Noka.