Klosi luan “tenis”, një italian nis vitin me sherr në Kamzë
Kanë rinisur dje ndeshjet e Kategorisë së Tretë. Dje janë luajtur dy takimet e para të javës së 3-të ku Spartaku realizon fitoren e tretë radhazi duke triumfuar me "poker" ndaj Shkëndijës së Tiranës, ndërsa në ndeshjen e dytë, ekipi matjan i Klosit ka luajtur "tenis" me skuadrën e Universitetit të Zojës së Këshillit të Mirë duke i shënuar 6 gola. Ndeshjet - Për sa i përket takimit të parë, skuadra e Spartakut ka hyrë vonë në lojën e saj dhe u deshën plot 45 minuta që kjo skuadër të dilte te goli. Pikërisht në të 45- ën ka qenë Kreshnik Ruço ai që shënon për të tijtë. Ka qenë një pasim i saktë i Sejdinit dhe Ruço nuk fal. Më pas, në fraksionin e dytë, skuadra e Spartakut nuk përmbahet dhe arrin të shënojë dhe tre gola të tjerë, me autorë Ruçon në minutat e 51-të dhe 88-të dhe Sejdinin në të 56-ën. Skuadra e Mjeshtërisë së Tiranës arrin të shënojë golin e nderit me anë të Iris Merlikës. Në ndeshjen e dytë ka pasur plot emocione, gola dhe spektakël, por nuk ka munguar edhe tensioni. Skuadra klosiane ka shpërthyer me një gjashtëgolësh, ku autorë janë bërë 6 lojtarë, Hallkaj, Kadiu, E.Rizvani, Liçi, Pera dhe Haxhija. Ndërsa për italianët e Universitetit Mjekësor të Zojës së Këshillit të Mirë kanë shënuar Meminaj dhe italiani Hermes Tarrallo. Te klosianët, që në minutën e 8-të, Rodens Porja ndrydh kaviljen dhe detyrohet të shkojë me ambulancë në spital. Por, gjatë kësaj ndeshjeje ka pasur edhe momente tensioni kur në të 80-ën italiani Hermes Tarrallo gjatë një konfliktimi me Ermal Rizvanin ka marrë kartonin e dytë të verdhë dhe më pas kartonin e kuq duke lënë fushën. E veçanta e këtij takimi ishte fitorja e thellë e Klosit që shkon drejt synimeve që ka në këtë kompeticion për t'u ngjitur në Kategorinë e Dytë. Pas ndeshjes, trajneri klosian Mareglen Beshiri tha: "Skuadra e Klosit synon të ringjitet në Kategorinë e Dytë ku 20 vjet më parë ka qenë pjesëmarrëse. Ekipi ka vetëm pak kohë që është formuar dhe është drejt konsolidimit të plotë, pasi ka mjaft elementë të rinj dhe shpresohet se me këtë fitore jemi në rrugën e duhur. Nuk na ka munguar as përkrahja e bashkisë së Klosit dhe kryetarit të saj, Basir Çupa që po bën gjithçka të mundur që skuadra jonë të plotësojë edhe kushtet për Kategorinë e Dytë. Kështu, bashkia e Klosit ka blerë tokën për ndërtimin e fushës dhe të impiantit për të zhvilluar ndeshjet në të Dytën", tha Beshiri. Abdulla Dushku