Lushnja do "dhurata" për ditëlindje

Qyteti i Lushnjës është përfshirë nga festimet e 21 janarit, 97- vjetorit të Kongresit Kombëtar të Lushnjës. Bashkia e Lushnjës ka organizuar disa aktivitete sportive. Ndërsa për ekipin e futbollit është një vit jubilar pasi 90 vjet më parë skuadra verdhejeshile mori formë të plotë. Një vit që Lushnja kërkon ta konkretizojë edhe me kalimin në Kategorinë Superiore. Për këtë lushnjarët vijojnë përgatitjet e tyre në kuadër të rifillimit të kampionatit. Lushnja ka kryesuar bindshëm gjatë këtij sezoni dhe një gjë të tillë kërkon të rikonfirmojë edhe me rifillimin e kampionatit më 4 shkurt. Mesfushori kuçovar Ergys Alushi, që luan sezonin e tij të dytë në stadiumin "Roza Haxhiu", shprehet: "Jemi të përkushtuar në përgatitjet që po bëjmë duke synuar që me rifillimin e kampionatit të kemi formën e duhur. Lushnja ka pasur një ecuri të mirë dhe kjo ka sjellë një situatë optimiste në ekip. Kemi ende rrugë dhe besoj se Lushnja do ta ruajë ritmin". Alban Alushi