"Kur ftova Galjardinin në Kombëtare, disa më qeshën"
"Kur ftova Galjardinin në Kombëtare, disa qeshën, ndërsa të tjerë e panë me shumë skepticizëm vendimin tim. Sot të gjithë po zbulojnë se kush është në të vërtetë Galjardini. Mendoj se është një lojtar i mrekullueshëm me një potencial të madh". Komisari teknik i Italisë është krenar për veten e tij pasi ka zbuluar klasin e mesfushorit të sapotransferuar në Milano. Nëntorin e kaluar Ventura grumbulloi 22-vjeçarin për ndeshjet me Lihtenshtejnin dhe Gjermaninë (miqësore) për të zëvendësuar Markizion, i cili ishte i dëmtuar. "Për ata që mendojnë se grumbullimet janë pa rëndësi, u them se gabojnë rëndë. Unë ftoj të rinjtë dhe ata që mendoj se kanë të ardhme pasi duhet që të mësohen me fanellën e Italisë", tha Xhampiero Ventura. Mes të tjerash, komisari teknik tha se së shpejti do të ftonte në kombëtare edhe Kiezën.