Qerimaj: Klubi po e shuan peshëngritjen, të ndalet katastrofa
Peshëngritësi Erkand Qerimaj ka hedhur akuza të forta ndaj "Sport Klub Vllaznia" dhe drejtuesit të këtij institucioni, Mark Kroqi. Qerimaj ka reaguar në lidhje me mosshpalljen e tij ndër 10 sportistët më të mirë të vitit në Shkodër dhe gjendjen skandaloze të vendit ku stërviten peshëngritësit e Vllaznisë, në korridorin e pallatit të sportit, ngjitur me tualetet. Fillimisht, Qerimaj ka shpërthyer në faqen e tij në "Facebook" duke e quajtur si një turp drejtorin Kroqi, i cili kërkon rezultate nga skuadra e Vllaznisë në peshëngritje, në një kohë kur s'ka një palestër për stërvitje. Qerimaj shpjegon arsyet e këtyre akuzave. "Unë kam reaguar sepse po shoh se po bëhet një padrejtësi. Unë kam fituar mbi 40 medalje në arenën ndërkombëtare dhe natyrisht që s'kam nevojë për atë karton a certifikatë që jep klubi shumësportësh, por kjo është një padrejtësi. Në aktivitetin e Kupës në vitin 2016 jam shpallur si sportisti më i mirë, për të mos folur për arritjet e tjera të mia. Dëgjova në një studio drejtorin Kroqi që tha se peshëngritja s'ka rezultate. Në fakt, kjo është e turpshme sepse peshëngritësit e Vllaznisë stërviten në një vend skandaloz, pa asnjë lloj kushti dhe në tualete e korridore. Nuk mund të kërkohen rezultate kur s'ka asnjë kusht dhe unë jam detyruar që të bëj një palestër në shtëpinë time dhe të stërvitem aty". Qerimaj shprehet se kështu si po veprohet po shkatërrohet peshëngritja, por edhe sporte të tjera në Shkodër. "Me këtë mënyrë po shkatërrohet tërësisht peshëngritja, por edhe sportet e tjera. Është e turpshme dhe duhet ta ndalim këtë gjë. Të gjithë sportistët kanë ikur nga skuadra e peshëngritjes sepse është normale, asnjë prind nuk do që fëmija i tij të vuajë në ato kushte skandaloze që janë. Vllaznia ishte skuadra kampione, me peshëngritës cilësorë, me medalje e suksese ndërkombëtare dhe tani, në vend që të na ndihmojë, klubi shumësportësh po na shkatërron, po e shuan ekipin. Atëherë s'ka si të ketë rezultate dhe asgjë tjetër. Mesazhi im është që të ndalet kjo katastrofë në kurriz të sportit". Peshëngritësi Qerimaj i kërkon KLSH-së që të vijë dhe të kontrollojë "Sport Klub Vllaznia" duke lënë të kuptohet se mund të jetë abuzuar me fondet e administruara nga ky institucion. Senad Nikshiqi