Idrizi: Nëse bashkia nuk shet asetet, iki brenda vitit
"Duam privatizim të mirëfilltë, nuk ka kthim pas"
Sinan Idrizi do të lar gohet nga Flamur tari, nëse brenda këtij viti nuk mbyllet procesi i privatizimit të klubit. Gjithçka është konfirmuar dje për "Panorama Sport" nga vetë administratori. Ky i fundit ka reaguar pas publikimit ekskluziv në gazetë një ditë më parë, ku zbulohej relacioni i bashkisë për klubin. Idrizi theksoi se nuk pranon asnjë kusht tjetër, përveç privatizimit total, duke futur këtu edhe shitjen e aseteve, për të cilat Bashkia Vlorë është kundër. "Nuk ka asnjë kthim pas nga kërkesat që ne kemi për privatizimin e klubit. E duam privatizim të mirëfilltë me të gjitha asetet. Nëse brenda këtij viti nuk bëhet siç duhet të bëhet privatizimi, atëherë nuk ka shanse që unë të qëndroj më. I përshëndes të gjithë dhe iki. Nëse nuk duan ta privatizojnë, le ta përdorin vetë. Nëse duan që ta privatizojnë, atëherë ta bëjnë siç duhet. Nuk është privatizim ta japësh me 18 apo 20 vjet në përdorim klubin. E përsëris, nëse nuk ndodh privatizimi total i klubit, unë tërhiqem në fund të vitit", ka thënë Idrizi. Kërkesa Administratori i Flamurtarit i kërkon Bashkisë së Vlorës që të bëhet promotore e një ligji për privatizimin e klubit, me të gjitha asetet. "Nëse nuk privatizohet klubi, atëherë për çfarë flasim? Unë kam harxhuar lekë, si do ta vazhdojmë tani? Ata e kanë të paqartë procesin. Unë them se është përdorur politikisht sporti, teksa për fushata elektorale shpalleshe kampion. Le ta privatizojmë që të marrim fund nga kapja e sportit nga politika. Pse nuk e bëjnë? Kjo është çudi e madhe. Ministria është hapur për zgjidhje, por bashkia dhe këshilli bashkiak janë të paqartë. Unë dua që Bashkia e Vlorës të bëhet promotore e kapitalizmit në sport. Pres që ajo të heqë dorë nga kjo politikë dhe kjo frymë që mbizotëron dhe të ndërtojmë së bashku një koncept të ndryshëm për të krijuar shansin që të shtohen ligjet. Ligjvënësit duhet që të na ndihmojnë që të ndërtohet një strukturë për çështjen e privatizimit. Unë nuk jam ligjvënës dhe nuk kam në dorë të ndryshoj ligje, por është e thjeshtë fare. Ligjvënësit tanë duhet që ta gjejnë rrugën e zgjidhjes së kësaj çështjeje, e cila është shumë e thjeshtë për ta gjetur", përfundoi Sinan Idrizi.