Bonaventurës i rrisin pagën, rinovon edhe një vit
"Xheku" do të përfitojë 2 milionë euro në sezon
Tani është zyrtare: Xhakomo Bonaven tura ka rinovuar kontratën me Milanin deri në vitin 2020. Kontrata e tij përfundonte në vitin 2019, por u zgjat me një vit. Kjo lëvizje e skuadrës dhe futbollistit kuqezi është bërë për të rritur pagën vjetore, e cila nga një milion euro ka shkuar në dy milionë. Bonaventura do të përfitojë edhe bonuse të ndryshme në varësi të ecurisë së skuadrës. Akordi mes Galianit dhe Mino Raiolës, agjenti i ish-mesfushorit të Atalantës, ishte arritur prej kohësh dhe mungonte vetëm miratimi nga drejtuesit kinezë. Ditën e djeshme ka ardhur firma, Xhek-u i Montelës është blinduar dhe do të vazhdojë të jetë një nga shtyllat kryesore për kuqezinjtë edhe për tri vitet e ardhshme. Në pritje të ndonjë përgjigjeje zyrtare për transferimin e Deulofeut në Milano, tifozët kuqezinj janë zgjuar me një lajm shumë të bukur.
Lider - Rinovimi i Bonaventurës është një sinjal shumë pozitiv për të ardhmen, duke parë që ishte pikërisht shoqëria kineze, ajo që dha miratimin për arritjen e marrëveshjes dhe zyrtarizimin e rinovimit të kontratës. Bonaventura është një nga lojtarët më të rëndësishëm të formacionit të Montelës, duke qëndruar në zemër të projektit për të ardhmen. 27-vjeçari ka shënuar 2 gola me fanellën kuqezi në këtë sezon dhe pikërisht të dy golat i kanë dhuruar fitoren skuadrës së Montelës. Jo vetëm për golat, por mbi të gjitha për performancat në fushë, këtë sezon Bonaventura ka qenë një nga lojtarët me notën mesatare më të lartë nga futbollistët e Milanit. Ai është një xhol për trajnerin, pasi mund të luajë si mesfushor i brendshëm dhe si sulmues anësor, pasi me gjendjen fizike dhe teknikën që ka e bën komod Montelën dhe i jep më shumë larmishmëri formacionit kuqezi. Gjatë këtij sezoni, Xhakomo Bonaventura ka qenë lojtari më i aktivizuar në radhët e skuadrës së Milanit duke luajtur në total 1458 minuta. Lëvizja për rinovimin e kontratës së tij u bë pikërisht për të shtuar pagën vjetore, e cila nuk mund të bëhej, në rast se nuk do të kishte rinovim kontrate. Vetëm për këtë fakt kontrata e tij u zgjat vetëm me një vit, në të kundërt mund të ishte zgjatur për disa vite të tjerë.