Tërhiqet Alonso, frikë për Lahmin

Drejtuesit bavarezë tremben se një vendim të tillë mund ta marrë edhe kapiteni

Ksabi Alonso nuk do të ketë fatin e Arjen Robenit dhe Frenk Riberisë në "Allianz Arena". Lojtari më i vjetër i Bajernit të Mynihut ( 35 vjeç) ka vendosur që "të varë këpucët në gozhdë" në fund të sezonit, kur i skadon edhe kontrata me klubin gjerman. Lajmi nuk është zyrtarizuar ende, por është zbuluar nga "Sport Bild".

Detajet

Revista gjermane ka zbuluar se përpara se të nisej për pushime në dhjetor, mesfushori spanjoll informoi drejtuesit e Bajernit, Uli Hënes dhe Karl- Hainc Rumenige, se në fund të sezonit do të mbyllë karrierën. Pas 18 vitesh në futbollin profesionist, ku ai fitoi dy Champions, por edhe Kupën e Europës dhe Botës me Kombëtaren e Spanjës, ish- ylli i Realit të Madridit dhe Liverpulit do të dalë në pension kur kontrata e tij në Mynih të skadojë më 30 qershor. Ai u transferua në Bundesligë në vitin 2014 pas 5 viteve në Madrid. Në Gjermani, Alonso ka fituar dy herë Bundesligën, Kupën dhe Superkupën e Gjermanisë. Në vitin 2014 ai vendosi që t'i japë lamtumirën karrierës së lavdishme me kombëtaren spanjolle ( 114 ndeshje). Roli i ri

Drejtuesit e Bajernit e kanë pranuar vendimin, por kanë në plan që t'i ofrojnë një rol të ri në klub futbollistit. Karlo Ançeloti është një admirues i tij dhe nuk përjashtohet mundësia që Alonsos t'i ofrohet një rol në stafin e tij.

Frikë për Lahmin

Pas lamtumirës së veteranit, Hënes dhe Rumenige duhet të gjejnë zëvendësuesin e tij në merkato dhe të punojnë për të bindur kapitenin Filip Lahm që të mos marrë të njëjtin vendim në fund të këtij sezoni.

Kontrata e mbrojtësit skadon në 2018- ën, por ai e ka lënë të hapur mundësinë e një tërheqjeje që këtë verë dhe është negociuar që mund të marrë edhe postin e drejtorit sportiv, i lënë vakant prej largimit të Matias Zamerit.