Selta trondit Realin, e gjunjëzon në Madrid
Ekipi nga Vigo shkëlqeu në kundërsulm, pranë gjysmëfinaleve
Reali i Madridit ka bërë një "autogol" në ndeshjen e parë të Kupës së Mbretit, duke humbur në shtëpi përballë Selta Vigos. Kjo ishte shuplaka e dytë radhazi për djemtë e Zinedin Zidanit, pas asaj kundër Seviljes, vetëm pak ditë më parë. Trajneri francez hodhi në fushë një formacion pa "kursim", ku majën e sulmit e udhëhiqte Kristiano Ronaldo, i mbështetur nga Asensio dhe Lukas Vazkez. Pjesa e parë u karakterizua nga një dominim i vendësve, të cilët krijuan disa mundësi të mira, sidomos me Vazkez, por pa mundur që të jenë të saktë para portës. Pak minuta pasi filloi pjesa e dytë, Zidan nxori Asension për të futur Alvaro Moratën, por kjo nuk rezultoi efikase. Në të 64ën, një aksion i shpejtë nga krahu i majtë nxori zbuluar mbrojtjen merengese, e cila nxori nga rrjeta topin e gjuajtur prej Aspas brenda zonës. Një gol që nuk i demoralizoi vendësit, të cilët arritën të reagonin rrufeshëm. Vetëm pesë minuta më vonë, Marselo shënoi një gol "kartolinë", kur gjuajti fluturimthi një top në hyrje të zonës. Gjithçka barazim dhe pritej që përmbysja e "gjigantëve" spanjollë të ishte thjesht formalitet. Por, taktika e trajnerit Berixo, për të shfrytëzuar në maksimum shpejtësinë e sulmuesve të tij, solli edhe një tjetër gol. Këtë herë ishte Joni që përdori një kundërsulm dhe përfitoi nga hapësirat në qendrën e prapavijës së kundërshtarit, për të mposhtur sërish Kasijën. As
futja e Karim Benzemasë nuk e ndryshoi fatin e ndeshjes, pasi edhe u bë protagonist, duke gabuar një rast me portën e boshatisur. Kjo humbje që trazon më shumë se kurrë ambientin madrilen, i cili duhet të përmbysë gjithçka në ndeshjen e kthimit, në transfertë.